Тошкент вилоятининг Бўстонлиқ тумани сўлим манзаралари ва тоза ҳавоси билан юртдошларимиз ва қолаверса, ҳорижий сайёҳларни ҳам ўзига жалб қилаётгани бор гап. Лекин Тошкент-Бўстонлиқ туристик маршрути маҳаллий ва ҳорижий сайёҳларни қабул қилишга қанчалик тайёр? Дам олиш кунларида йўналишлардаги тирбандликлар, антисанитар дам олиш “дача”лари, сифатсиз хизмат нархлардаги “чегарасизлик”ларга барҳам бериш бўйича қандай ишлар қилинмоқда? 2 июль куни Туризмни ривожлантириш давлат қўмитаси ва бир қатор давлат ташкилотлари ҳамкорлигида ташкил қилинган пресс-турда ушбу саволларга жавоб топишга уриндик.
НАРХЛАР НИМА УЧУН ҚИММАТ?
Буни англаш қийин эмас. Агар таклиф талабдан юқори бўлса, нархларнинг ошиб кетиши бозор иқтисодиёти қонунидир. Бўстонлиқ туманига дам олиш кунлари ташриф буюрсангиз, ҳаттоки жамоангиз учун биттагина “тапчан” топиш ҳам мушкулотга айланади. Сабаби дам олувчилар жуда кўп. Асосий даромади туризм ҳисобланган туман аҳолиси деярли барча жойларни “эгаллаган”. Пресс-тур давомида қонун-қоидаларга зид равишда юқори кучланишли электр тармоқлари ўтган ҳудудларда ҳам, сув қирғоқларида ҳам “дача”лар қурилганига гувоҳ бўлдик. Уларнинг бир кунлик хизмат нархлари эса 500 000 сўмдан фалон минг долларгача. Хизмат сифати эса фақат қиммат гўшаларда таъминланган. Қисқаси “тўла ва яша” тамойили ҳукмрон. Ҳатто баъзи чет эл мамлакатларида дам олиш харажати Бўстонлиққа нисбатан арзонроқ эканлиги ҳам тажрибада синалган.
Туризмни ривожлантириш давлат қўмитаси раиси Азиз АБДУҲАКИМОВ:
"Айнан шундай ҳолатларга барҳам бериш, ҳудудда рақобат муҳитини яратиш мақсадида туристик маршрут бўйлаб турли ҳажмдаги меҳмонхоналар, туристик объектлар қурилиши режалаштирилган. Бўстонлиқнинг табиий манзараларини сақлаган ҳолда сайёҳларга сифатли ва ҳамёнбоп хизмат кўрсатиш таклифлари билан мурожаат қилаётган инвесторларнинг аризалари қаноатлантирилиб, улар учун жойлар ажратилмоқда. Маҳаллий хизмат кўрсатувчиларнинг нархлари жуда қиммат. Ҳамманинг ҳам имкони етавермайди. Шунинг учун ушбу мавсумдан бошлаб туман ҳудудида мавсумий арзон чодирлар, енгил конструкцияли дам олиш иншоотлари, ўтовлар ўрнатилиши бошланади. Ушбу объектларнинг нархлари анча ҳамёнбоп бўлиб, маҳаллий хизмат кўрсатувчиларникидан 5-10 бараваргача арзон бўлиши кутиляпти. Кейинги босқичда меҳмонхоналар ҳам қурилиб, хизмат кўрсатиш сифати яхшиланади ва нархлар ҳам анча арзонлашади."
“Айнан Бўстонлиқ туманининг шундай гўзал манзаралари бўлгани учун биз Франция, Германия ва Туркия давлатлари билан фикр алмашган ҳолда бу ерда катта туристик зона қилмоқчимиз.Оддий ўқитувчи, шифокор ходимлар бу ердаги қиммат дачаларга кела олмайди. Биз шу томонларни ўйлаган ҳолда 3-4 қаватли отеллар қуришни режалаштиряпмиз”, – дея пресс-тур давомида мавзуга изоҳ беради Тошкент вилояти прокурори Салом Самадов.
Пресс-саёҳатимиз мобайнида туристик маршрутдаги қилинаётган ишлар ва режаларга бевосита гувоҳ бўлдик.
Сардорбек Раҳмонқулов
