Bo`stonliqdagi “snos”lar mojarosida kim haq: Aholiga kompensasiya to`lanmaydimi?

Jamiyat 04.07.2020, 21:44
Bo`stonliqdagi “snos”lar mojarosida kim haq: Aholiga kompensasiya to`lanmaydimi?

2 iyul kuni bir qator davlat tashkilotlari hamkorligida Toshkent viloyati Bo`stonliq tumanining turistik yo`nalishlarida amalga oshirilayotgan ishlar, Bo`stonliq aholisining “snos”lar bo`yicha ijtiomiy tarmoqlar orqali ko`targan mojarolari yuzasidan press-tur tashkil etildi.

Avval o`zboshimchalik bilan qurilgan ob`ektlar bo`yicha mas`ullar fikrini havola etamiz: 

“DAVLAT ORGANLARIDAGILAR HAM O`ZIMIZGA O`XShAGAN ODAMLAR”

Aziz ABDUHAKIMOV, Turizmni rivojlantirish Davlat qo`mitasi raisi:

"Ko`p yillar davomida Bo`stonliq tumanida noqonuniy qurilish ishlarini qilish oddiy holatga aylangan. Qonun ustuvorligi ta`minlamagani uchun ko`pchilik: qonunni buzsak, davlat organlaridagilar ham o`zimizga o`xshagan odamlar, borib kelishamiz, biror ehtiyojini qilib beramiz, degan fikrda yurgan. O`rganishlar jarayonida bir narsadan hayron bo`ldik, ochig`i. Nafaqat Bo`stonliqda, balki boshqa hududlarda ham fuqarolar noqonuniy tarzda egallamoqchi bo`lgan erlariga avvaliga tosh terib qo`yarkan, keyin sekingina yog`och taxlaydi, undan so`ng g`isht teradi va ustini yopadi. So`ng turli yo`llar bilan egalik huquqini qo`lga kiritishadi."

ShU KUNGAChA NEGA NOQONUNIY QURILIShLAR QILINIShIGA QO`YIB BERILGAN?

Xolmo`min YoDGOROV,Oliy sud raisi o`rinbosari:

"2018 yil 20 apreldagi “Fuqarolarni ijtimoiy qo`llab-quvvatlash bo`yicha qo`shimcha chora-tadbirlar hamda o`zboshimchalik bilan qurilgan turar joylarga nisbatan mulk huquqini e`tirof etish bo`yicha bir martalik umumdavlat aksiyasini o`tkazish to`g`risida”gi Prezident farmoniga ko`ra barchaga imkoniyat berilgan. Lekin ba`zilar undan keyin qurilish qilishda davom etavergan. Yuqorida joylashgan yosh bolalarning sil kasalliklari shifoxonasi hududlariham talon-toroj qilingan. Kimdir uy qurib olgan, kimdir endi uy quryapti. “qursa bo`laverar ekanda” degan tushuncha bilanmi, hech qanday asossiz mazkur hudud egallab olingan. O`rganishlar natijasida shifoxona hududiga tegishli maydonda 24 ta uy-joy 2018 yildan keyin o`zboshimchalik bilan qurib olingan. Bu holatni Google xaritasi orqali ham ko`rish mumkin. O`zboshimchalik bilan qurilgan uylar buzilishi bo`yicha bir necha martta ogohlantirilgan. Lekin qurilishni davom ettiraverishgan. Mazkur 24 ta uyda faqatgina 1 tasidagina odam yashashi aniqlangan. Qolganlariesa sud qarori chiqqandan keyin kelib olib, endi ijtimoiy tarmoqlarda uysiz qolamiz, deya murojaat qilishmoqda. Bir ayolning suv bo`yida qurilgan uyi buzilyapti. Ayol esa ijtimoiy tarmoqqa chiqib olib, dod-voy solib, uyimni ogohlantirishsiz buzishyapti deyapti. Vaholanki, ikki oydan beri ogohlantirib kelyapmiz. Bu erda qurish mumkin emas, deb qancha aytdik. Hujjatim bor deb chiqdi. 2019 yilda 1998 yilgi hujjatni qalbakilashtirib olgan. Chunki qaynotasi mahalla raisi bo`lgan. Hujjati qonuniy bo`lib, jamoat ehtiyoji uchun uning mulki yoki eri olinganida, so`zsiz kompensasiya berilardi. Ya`ni eri uchun er, uyi uchun uy, agarda u uyi bitguncha ijarada yashasa, ijara puli ham beriladi."

PROKURATURA NIMA DEYDI?

Salom SAMADOV,Toshkent viloyat prokurori:

"Qurilishga biz qarshi emasmiz, mayli qursin, lekin qonuniy tomondan qurilsin.Hokimiyat tomonidan qonuniy erlar ko`rsatilmagani va bee`tibor qoldirilgani uchun shu holatga kelgan, korrupsiya bo`lgan.Ko`p yillardan beri Bo`stonliq tumanida noqonuniy qurilish qilish oddiy holga aylangan. Natijada 2020 yil 11 may holatiga ko`ra, 8ta jinoyat ishi qo`zg`atilgan.Ular orasida mahalla raisi, “Ergeokadastr” xodimi, maklerlar bo`lib, jami 10 nafar odam tergov oldida javob beryapti. Bo`stonliq tumanidagi 594ta ob`ekt noqonuniy deb topilgan va 24ta mana shunday noqonuniy tarzda qurilgan uylarning egalari sudga chaqirilganida kelishmagan."

TANGANING IKKINChI TOMONI...

Qonunga itoat qilish barchamizning burchimizdir. Lekin tanganing ikkinchi tomoni bo`lgan xalq, ya`ni uy-joyi buzilishidan norozi bo`layotganlar barcha hujjatlari haqiqiy ekanligi, doimiy ravishda barcha soliqlarni to`lab kelishayotganligi va uylari buzilishi bo`yicha sud qarorlari chiqayotgani va bunda kompensasiya ajratilmayotganidan arz qilishmoqda.

XULOSA O`RNIDA

Bo`stonliq tumanidagi Chimgan MFYda o`zboshimchalik bilan qurilgan deya baholanayotgan uy-joylar egalari bugun qo`llaridagi hujjatlar davlat idoralari tomonidan rasmiylashtirilganini da`vo qilishib, hukumatdan adolat so`rashmoqda. 2019 yil 16 noyabrda qabul qilingan “Jismoniy va yuridik shaxslarning mulk huquqlari kafolatlarini ta`minlash hamda er uchastkalarini olib qo`yish va kompensasiya berish tartibini takomillashtirishga doir qo`shimcha chora-tadbirlar to`g`risida”gi 911-sonli Vazirlar mahkamasi qarori 41-bo`lim “d” bandida “O`zboshimchalik bilan qurilgan uy-joy, ishlab chiqarish va boshqa binolar va inshootlarning qiymati ham qoplanishi lozim”, - deyilgan. Sud nega qaror ijrosini ta`minlamayapti? Noqonuniy hujjat qilishda gumonlangan mas`ullar javobgarlikka tortilsa, qolgan uyi buzilayotganlarning holi ne kechadi? Aynan shu holat bo`yicha mas`ullarimizdan izoh kutib qolamiz. 

Sardorbek Rahmonqulov

 

Sharhlar

Ob-havo: Toshkent
Valyuta kursi
1