Navoiyda 38 yoshli bemor (erkak) koronavirusdan vafot etdi, deya xabar berdi Navoiy viloyati hokimligi Axborot xizmati.
Navoiy shahrida yashovchi X.Sh. 2020 yil 2 iyul COVID-19 infeksiyasiga namuna topshirgan va unda kasallik tasdiqlangan. Bemor shu kunning o`zida Navoiy viloyat bolalar yuqumli kasalliklar shifoxonasiga yotqizilgan.
Unga "COVID-19" infeksiyasi og`ir kechishi tashxisi qo`yilgan. Kasallik ikki tomonlama zotiljam, nafas etishmovchiligining 1-2-darajasi asorati bilan kechgan.
Bundan tashqari bemorda gipertoniya 3-daraja, arterial gipertenziya 2. Xavf – III, semizlikning 1-darajasi kabi hamroh kasalliklari bo`lgan. Shuningdek, bemor 2019 yildan buyon gipertoniya kasalligi bilan nazoratda turgan.
6 iyul kuni bemorning ahvoli o`ta og`irlashgan hamda mutaxassislar tomonidan konsultasiya qilinib, davolash jarayoni tegishli mutaxassislar tavsiyasi asosida olib borilgan.
Ammo shunga qaramasdan bemorning ahvoli keskin og`irlashgan. Reanimasiya bo`limi mutaxassislari tomonidan to`liq hajmda, standart asosida o`tkazilgan reanimasion choralar samara bermagan hamda biologik o`lim qayd etilgan.
Ayni paytda ma`lum qilinishicha, Navoiyda vafot etgan bemor "O`zsanoatqurilishbank"ning Navoiy viloyati filiali boshqaruvchisi o`rinbosari Xurshid Shabonov bo`lgan.
