Qashqadaryo viloyati Iqtisodiy sudining 18.06.2020 yildagi ijro varaqsiga asosan, qarzdor jamiyatdan davlat foydasiga 52 mlrd. 569 mln. 789 ming 300 so`m soliq qarzdorligini undirish haqidagi ijro ishi Byuroning Yashnobod tuman bo`limiga joriy yilning 29 iyun kuni kelib tushgan. Bu haqda MIB matbuot xizmati xabar bermoqda.
Bo`lim davlat ijrochisi J.Raxmatov tomonidan shu kuni O`zbekiston Respublikasi “Sud hujjatlari va boshqa organlar hujjatlarini ijro etish to`g`risida”gi Qonunning 23-moddasiga asosan 24221/14-sonli ijro ishi yuritish qo`zg`atilgan.
Bo`lim davlat ijrochisi tomonidan qarzdorga belgilangan tartibda ixtiyoriy muddat berilgan. Olib borilgan majburiy ijro harakatlari davomida qarzdorga nisbatan majburiy ijro choralari qo`llanilib, unga tegishli barcha valyuta, maxsus blok va ikkilamchi hisob varaqlar aniqlanib, asosiy vositalarga va qarzdorga tegishli bo`lgan barcha ko`char va ko`chmas mol-mulklariga band solingan.
Qarzdorga tegishli band solingan mulklarni davlat ijrochisi tomonidan realizasiya qilish choralari ko`rilayotgan bir vaqtda qarzdor jamiyat tomonidan davlat foydasiga 52 mlrd. 569 mln. 789 ming 300 so`m soliq qarzdorligini to`liq to`lovni amalga oshirgan.
Eslatib o`tamiz, Bosh prokuratura huzuridagi Majburiy ijro byurosi organlariga karantinli vaziyat sabab, murojaatlar “1107” qisqa raqamili ishonch telefoni yoki elektron tarzda “mib.uz” rasmiy saytidagi “Byuroga murojaat” ruknining “Virtual qabulxona” sahifasi orqali qabul qilinmoqda.
