Jizzax viloyati IIB patrul-post xizmati va jamoat tartibini saqlash boshqarmasi xodimlari tomonidan G`allaorol tumanidagi “Sangzor-15” yo`l patrul xizmati maskanida Toshkent yo`nalishida harakatlanayotgan “KIA BONGO” rusumli avtoulov to`xtatib, tekshirilganida avtomashina yukxonasida 2 tonna 640 kilogramm go`sht hech qanday hujjatlarsiz olib ketilayotgani aniqlandi.
Surishtiruv davomida Qashqadaryo viloyati Chiroqchi tumani Chuvilloq qishlog`ida yashovchi, 1986 yilda tug`ilgan “KIA BONGO” haydovchisi A.A. go`shtni Toshkent shahridagi “Chorsu” bozorida sotish uchun olib ketayotganligini bildirgan.
Qo`lansa hid taratayotgan, rangida o`zgarishlar kuzatilgan mazkur mahsulot Jizzax shahridagi muzxonalardan biriga joylashtirildi.
Kasallik uyg`otuvchi omillar bor-yo`qligini aniqlash maqsadida go`sht namunalari Jizzax viloyati sanitariya-epidemiologiya osoyishtaligi markazi laboratoriyasiga topshirilgan. Holat yuzasidan surishtiruv harakatlari olib borilmoqda.
