“Er resurslari va davlat mulki ob`ektlaridan foydalanish samaradorligini yanada oshirish chora-tadbirlari to`g`risida” Prezident Farmoni qabul qilindi.
Farmonga muvofiq, 2020 yil 1 noyabrdan boshlab Soliq kodeksi bilan berilgan quyidagi imtiyozlar bekor qilinadi:
Er solig`i bo`yicha quyidagilar tomonidan egallangan er uchastkalari:
• sog`lomlashtirish hamda dam olish joylari, xususan dam olish uylari;
• aholining ommaviy dam olishi va turizm uchun joylar, agar ular tadbirkorlik faoliyati uchun ajratilgan bo`lsa;
• sanatoriy-kurort ob`ektlari, agar ular turistik zonalarda joylashgan bo`lsa;
Mol-mulk solig`i bo`yicha sanatoriy-kurort xizmatlari ko`rsatish uchun foydalaniladigan ko`chmas mulk ob`ektlari, agar ular turistik zonalarda joylashgan bo`lsa.
Qoraqalpog`iston Respublikasi Jo`qorg`i Kengesi hamda xalq deputatlari viloyatlar Kengashlariga turistik zonalarda alohida sanatoriy-kurort ob`ektlari egallagan erlar uchun mol-mulk va er solig`ining kamaytirilgan stavkalarini qo`llash yoki ushbu soliqlarni to`lashdan ozod qilish vakolati berildi.
2020 yil 1 sentyabrga qadar Toshkent viloyatining Bo`stonliq tumanida joylashgan byudjet tashkilotlari va davlat korxonalari, ustav fondida davlat ulushi 50 foiz va undan ortiq bo`lgan yuridik shaxslarga tegishli bo`lgan idoraviy dam olish uylari, pansionatlar, sanatoriylar va boshqa ob`ektlarni (bolalar dam olish lageridan tashqari) xususiy sektorga sotish bo`yicha tegishli takliflar ishlab chiqiladi.
Shuningdek, 2021 yil uchun Davlat byudjeti loyihasini tayyorlashda respublikaning turistik zonalaridagi alohida er uchastkalari, shu jumladan jismoniy shaxslar foydalanishida bo`lgan 1 gektardan ortiq er uchastkalari uchun mahalliy davlat hokimiyati organlari tomonidan er solig`ining 3 baravarigacha oshirilgan stavkasini belgilash ko`zda tutiladi.
