Ҳантавирус асосан кемирувчиларда учрайдиган вирус бўлиб, инсонга уларнинг сийдиги, ахлати ёки сўлаги орқали юқади. Ёпиқ хоналарни тозалаш, ферма ёки ўрмонларда ишлаш каби ҳолатлар хавфни оширади.
Олимлар анд вируси ҳантавируснинг инсондан инсонга юқиши мумкин бўлган ягона тури эканини таъкидлади. Бироқ бу жуда кам ҳолатларда, яқин ва узоқ мулоқот орқали кузатилади.
Касалликнинг асосий белгилари: иситма, бош ва мушак оғриғи, кўнгил айниши, қорин оғриғи ва қусиш. Оғир ҳолатларда ўпка, юрак ёки буйракка таъсир қилиши мумкин.
Ҳантавирус турига қараб инсонда турли оғир касалликларни келтириб чиқариши мумкин. У ўпка ва юракка таъсир қилувчи ҳантавирус кардиопульмонал синдроми ёки буйракни зарарловчи геморрагик иситмани чақириши эҳтимолли бор.
Мутахассислар маълумотига кўра, Шимолий ва Жанубий Америкада тарқалган вируслар кўпроқ ўпка ва юракка таъсир қилса, Европа ва Осиёдаги турлари асосан буйрак билан боғлиқ асоратларни келтириб чиқаради.
Айни пайтда олимлар ушбу штамм бошқа Андес вирусларига нисбатан тезроқ тарқалиши ёки оғирроқ касаллик чақириши ҳақида далил йўқлигини билдирди.
ВОЗ маълумотига кўра, ҳантавирус кам учрайдиган касаллик ҳисобланади. Унга қарши махсус даво мавжуд эмас, шифокорлар асосан симптомларни енгиллаштиришга ҳаракат қилади. Ўлим кўрсаткичи Европа ва Осиёда 1–15 фоиз, Америка қитъасида эса 50 фоизгача етиши мумкин.
ВОЗ маълумотига кўра, кенг аҳоли орасида вирус тарқалиш хавфи “жуда паст” деб баҳоланмоқда.
