Россиянинг Ростов- на- Дону шаҳри клиникаларидан бирида юзни тортиб, ёшартириш бўйича ўтказилган жарроҳлик амалиётини бошидан ўтказган аёл вафот этди. Бу ҳақда “Lenta.ru” хабар бермоқда.
Тергов маълумотларига кўра, 1961 йилда туғилган бу аёл 22 январь куни шаҳардаги пластик жарроҳлик клиникаларидан бирига юзни ёшартириш бўйича муолажа ўтказишни хоҳлаб, мурожаат қилган. Жарроҳликдан икки кун ўтгач, у шифохонада вафот этган. Ҳозирча ўлим сабаби аниқланмаган. Ҳолат бўйича Россия Федерацияси ЖКнинг 238-моддаси 2-банди (хавфсизлик талабларига жавоб бермаслик оқибатида инсон ўлимига сабаб бўлиш) билан жиноят иши қўзғатилган.
“Комсомольская правда” газетасининг берган маълумотига кўра , аёл 12 йилдан бери Италияда яшаган. Январда қариндош-уруғларини кўриш ва пластик жарроҳлик амалиётини ўтказиш учун Россияга қайтган. У мурожаат қилган клиника уч йилдан бери фаолият юритиб, бошқа клиникалардан нархнинг арзонлиги билан фарқ қилган.
Жорий йилнинг январь ойида рязанлик аёл ҳам пластик жарроҳлик вақтида дори препаратларига аллергик реакцияси борлиги туфайли анафилактик шокдан вафот этган эди.
