Тошкент ер усти халқа метросининг “Дўстлик-2” бекатидан “Қўйлиқ” бекатигача бўлган йўналишининг 4-бекатида дарча ҳосил бўлгани тўғрисида хабар тарқалган эди. Ўзбекистон Темир йўллари АЖ ҳолат юзасидан маълумот берди.
Хабарга кўра, айни кунларда “Дўстлик-2” – “Қўйлиқ” йўналиши бекатларида кабел учун ўтказиш кўприги (кабельный мостик) қуриш ишлари лойиҳа ҳужжатларига асосан қурилишнинг ИИ-босқичида амалга ошириш режалаштирилган. Электр кабелларини эстакада остки қисмидан ўтказиш иншоотлари қурилиши лойиҳалари ишлаб чиқилиб, ўрнатилган тартибда экспертизадан ўтказилган ва ижобий хулоса олинган. Бугунги кунда бекатларда кабел ўтказиш кўпригини қуриш ишлари амалга оширилмоқда.
Ижтимоий тармоқларда тарқаган “ўпирилиш” метронинг 4-бекатида қурувчилар томонидан 24 феврал куни тунги соат 00:00дан кейин, яъни метро поездлари ҳаракати тўхтатилгандан сўнг, кабел ўтказиш кўпригини қуриш учун махсус ускуна ёрдамида лойиҳа ҳужжатларига асосан бетоннинг бир қисми очилган. Метро эстакадаси остидан ҳаракатланувчи пиёдалар ва автомобиллар хавфсизлигини таъминлаш мақсадида тунги пайтда ишлар ташкил қилиниб, қурилиш меъёр ва қоидалари асосида амалга оширилмоқда ва мутахассислар томонидан назоратга олинган хавфсизлик қоидаларига риоя этилади. Кабел ўтказиш кўприги қурилиши эстакада мустаҳкамлигига зарар етказмайди.
Махсус дарча очиш ишлари якунлангандан сўнг йўлдаги чиқиндилар тозаланган.
