Юрагим ва курагим атрофида оғриқ бўлиб туради. Яқинда юрак атрофидаги оғриқларнинг ҳаммаси ҳам юрак кассаликларидан эмас деган гапни эшитиб қолдим. Шу ростми? Юрак атрофидаги оғриқлар қайси кассалликлар билан боғлиқ бўлиши мумкин?
Темур Зайниддинов, Бухоро
Саволга олий тоифали функционал ташхис қўйиш шифокори Ситора Налибаева жавоб беради
Ҳар бир киши умрида бир марта бўлсада кўкрак қафасида, курагида ёки юрак атрофида оғриқ ёки ёқимсиз ҳолатни ҳис қилиши мумкин. Бу безовталик танамизнинг энг муҳим аъзоси юрак атрофида юз берганлиги туфайли, хавотир олишимиз табиий. Келинг, аввал оғриқнинг турлари ҳақида гаплашиб олайлик.
Оғриқ турлича бўлади:
Санчиқли, сиқувчан, симиллатувчан, ёндирувчан, зирқиратадиган.
Оғриқ тананинг маълум бир жойида ёки бутун танага тарқалган бўлиши мумкин. Елкада, куракда, чап қўлда, пастки жағда, қоринда пайдо бўлиб, бир неча дақиқа ёки бир неча соатлаб, ҳатто кунлаб давом этиши мумкин. Қўл қимирлаганда, тана ҳолати ўзгарганда, ёки нафас олганда эса зўрайиши ҳам мумкин. Баъзи пайтда овқатланганда, тинч ҳолатда, жисмоний иш қилаётганда ёки ҳаяжонланганда ҳам оғриқ пайдо бўлади.
Сабаблар
Оғриқ пайдо бўлишинг сабаби жуда кўп: юрак касалланганда, стенокардия, инфаркт миокардда, юрак шамоллаганида, ревматологик хасталиклар. Неврозда, кўкрак қафаси ва қовурғалар шамоллаганида, ошқозон ва ичак касалликларида эса оғриқ юрак атрофида ва курак атрофида сезилади
Юрак нега оғрийди?
Бунинг сабаби нимада? Нега тез ёрдамга энг кўп мурожаат юрак оғриғи сабабли бўлади
Юракдаги оғриқ 2 та асосий гуруҳга бўлинади:
Ангиноз оғриқлар — бунга юракнинг ишемик касалликлари;
Кардиалгиялар — юрак шамоллаш орқали юзага келган; туғма пороклар ёки вегетатив дистониклар.
Ангиноз (ишемик, стенокардия) оғриқлар ҳаяжонланганда, жисмоний зўриқишда қон оқимининг кучайишида юзага келади. Шунинг учун бу оғриқ юрганда, ҳаяжонланганда, асабийлашганда пайдо бўлади ва бу ҳолатда шифокор билан маслаҳатлашиб, тезда нитроглицерин қабул қилиниши керак. Ишемик оғриқлар ёндирувчан, сиқилувчан, қисувчан бўлиб, одатда кўкрак орқасида, ўнг елкада, қўлда, курак тагида ва жағнинг пастки қисмида кузатилади. Оғриқ кучли нафас қисиши билан кузатилади. Кучли, эзувчи, сиқувчи, ва ёндирувчи кўкрак орқасида ёки чап тарафида пайдо бўлган оғриқ — ўткир миокард инфаркти даракчиси бўлиши мумкин, бу ҳолатда нитроглицерин ёрдам бермайди.
Кардиалгия юрак ревмотологик хасталанганда, миокардитда, юракнинг ташқи пардаси шамоллаши — перикардда юзага келиб, оғриқ узоқ, санчиқли, зирқираб оғрувчи бўлади ва кўкракдан чапроқда пайдо бўлиб йўталганда ва нафас олганда зўраяди. Бу ҳолатда хам нитроглицерин ёрдам бермайди, аммо оғриқни қолдирувчи дори дармонлар ёрдам беради.
Юрак атрофидаги оғриқлар қандай ҳолатларда юрак билан боғлиқ эмас.
Агар юрак атрофидаги оғриқ тана эгилганда ёки бурилганда, чуқур нафас олганда, нафас чиқарганда, қўллар ҳаракатлантирилганда пайдо бўлса, нитроглицерин ва валидол ёрдам бермайди, чунки бу радикулит ёки қовурғаларнинг касалланганлиги бўлиши мумкин.
Қовурға орасидаги санчиқли, ноаниқ оғриқ асаб тизими касаллиги (невроз)да ҳам учрайди.
Руҳий зўриқиш, руҳий тушкунликда оғриқ бўйин ва елкада бўлади. Бунда “юрагим оғрияти шекилли” деб кардиологга мурожаат этган беморни тинчлантириб, бошқа мутахассисларга учраш тавсия этилади.
Худди шундай оч қолганда ёки овқат еганда оғриқ бўлса, бу ошқозон ёки ошқозон ости бези касалланганлигининг белгиси бўлишим мумикн. Оғриқнинг сабаби умуртқа поғонасининг кўкрак қафаси касаллиги ёки остеохондроз ҳам бўлиши мумкин.
Оғриқ сабаби қандай аниқланади?
Оғриқнинг сабабини аниқлаш учун кардиолог ва кардиожаррох белгилаб берган текширувлардан ўтиш лозим.
Булар:
Коронарография усули коронар артерия холатини текширади.
Миокард сцинтиграфия усули юрак мушакларидаги қон етишмовчилигини аниқлайди.
Юракка тегишли бўлмаган оғриқни аниқлаш
Юракка тегишли бўлмаган оғриқни текшириш учун умуртқа поғонасини рентгенография, компьютер ва магнит-резонанс томография қилдириш, невролог, ортопед, гастроэнтеролог ёки тиббий психологга мурожаат қилиш лозим.
Ташхис қўйилиб, оғриқ сабаби аниқлангач, шифокор тегишли муолажаларни белгилайди. Шундай экан юрак ва унинг атрофидаги оғриқларда ўзбошимчалик билан уй шароитида даволанишга йўл қўйиб бўлмайди
