Шоҳимардонга сел келди, ҳовли ва уйлар сувга тўлди (фото)

 Фарғона вилоятининг Шоҳимардон тумани  Ёрдон қишлоғига сел келди. Бу ҳақда махсус мухбиримиз Ахрор Зиё хабар бермоқда. 

Маълум бўлишича, сел натижасида тоғ яқинида яшовчи фуқароларнинг хонадонлари талофат кўрган. Таҳминан кундузги  ўн иккиларда ёмғир ёғиб, дўлга айланган. Ҳар бири довуччадай келадиган дўл бир пастда ҳамма жойни сувга тўлдирган. 

Одамларнинг айтишича, ёғингарчилик тахминан 40 дақиқа давом этган. Агар у узоқроқ давом этганда, йиғилган сувни бошқаришнинг иложи бўлмаслиги мумкин эди. Фақатгина ёмғир ва дўл ҳисобига ҳовлилар сувга тўлиб, уйларнинг ичигача кириб кетган. Сел суви ариқлардан тошиб, қишлоқ йўлларини вайрон қилган. Мевали дарахтлар ҳосилини тўкиб ташлаган. Аҳолининг томорқасидаги экинларга ҳам зарар етган.

 Фуқароларга шикаст етмаган.Ҳозирда Фарғона тумани ҳокимлиги тезкор гуруҳларни аҳоли хонадонига жалб қилиб, хонадонларда тўлиб қолган қум ва тошларни тозалаш ишларини олиб борганлар.

Эслатиб ўтамиз, аввалроқ Наманганнинг Косонсой туманига сел келгани ҳақида хабар қилган эдик.