Ижтимоий тармоқларда "Akay City" қурилиш майдони яқинидаги сўнгги турар жой биноси бузиб ташланганидан сўнг бир гуруҳ фуқаролар йўлни тўсиб қўйишга ҳаракат қилишгани ҳақида видео хабарлар тарқалди.
Мирзо Улуғбек туманининг аниқлашича, "PLIT INDUSTRY BUILDING " турк компанияси томонидан М.Улуғбек туманининг Қори Ниёзий ва Лашкарбеги кўчаларининг оралиғида "Akay city" кўп қаватли турар-жой ва савдо комплекси қурилаётган бўлиб, Қори Ниёзий кўчаси, 25 уй манзилида фуқаро Ч.Расуловга тегишли бўлган турар-жой биноси ва қўшимча қурилмаларнинг бузилиши учун қурилиш компанияси томонидан компенсация тўланиши кўзда тутилган.
Компенсация қийматини аниқлаш бўйича компания вакиллари ва Ч.Расулов ўртасида вужудга келган келишмовчиликлар 2021 йил 17 майда Фуқаролик ишлари бўйича Мирзо Улуғбек туманлараро суди томонидан кўриб чиқилган. Суд қарорига кўра, компания келтирилаётган зарарни 2 млрд сўм қийматида қоплаши керак бўлган. Кейинчалик Ч.Расуловнинг шикоятлари Тошкент шаҳар ва Ўзбекистон Республикасининг Олий суди томонидан апелляция ва кассация тартибида кўриб чиқилган, бироқ туманлараро суднинг қарори ўзгаришсиз қолган.
Бундан сўнг, суд қарорига мувофиқ 2 млрд сўмлик коменсация МИД томонидан кўрсатилган кўчмас мулкнинг олтин нафар эгаси орасида тақсимланган. Хусусан, Ч.Расуловнинг собиқ хотинига – 50% (1 млрд сўм), Ч.Расулов, унинг укаси, укасининг хотини, шунингдек, фуқаролар А.Султонхўжаев ва Н.Зиёхўжаеваларга мол-мулкнинг умумий қийматидан 10 % дан (200 млн сўмдан) берилиши кўзда тутилган.
Маълум қилинишича, бу суммага рози бўлмаган хонадон эгалари умумий майдони 350 м2 бўлган бузилаётган турар-жой биноси ва қурилмалар учун бир нечта тенг қийматли квартиралар берилишини талаб қилишган.
Ўтказилган текширув чоралари кўрсатишича, Тошкент шшаҳар ҳокимининг 2015 йил 31 декабрдаги қарорига кўра, 1,6 гектарлик майдон бузилаётган бино-иншоотлар эгаларига компенсация тўлаш шарти билан "PLIT INDUSTRY BUILDING" компаниясига ажратилган.
Юқорида кўрсатилган манзилда жойлашган турар-жой ва қурилмаларнинг умумий майдони 400 м2 бўлиб, улар Ч.Расулов ва унинг собиқ хотини ўртасида биргаликда орттирилган мулк сифатида тақсимланган.
2020 йил 11 мартда нотариал тасдиқланган ҳадя шартномасига мувофиқ Ч.Расулов ўзига тегишли бўлган кўчмас мулк қисмини 5 қисмга – ўзи, укаси, укасининг хотини, А.Султанходжаев ва Н.Зиёхўжаевалар ўртасида, ҳар бирига 10% дан тақсимлаб чиққан.
Ҳозирги кунда, ажратилган компенсациянинг умумий қийматидан 1 млрд сўми Ч.Расуловнинг собиқ хотинига, 400 млн сўми фуқаролар А.Султанходжаев ва Н.Зиёхўжаевага берилган.
Қайд этилишича, Ч.Расуловнинг норозилиги сабабли, унга, унинг укаси ва укасининг хотинига тегишли бўлган 600 млн сўм МИБнинг депозит рақамида сақланмоқда.
Қурилиш майдонини тезроқ бўшатиш мақсадида, қурилиш компанияси суд қарорига мувофиқ ажратилган 2 млрд сўмдан ташқари Ч.Расуловга 117 м2 майдонли, баҳоси 150 минг АҚШ доллар қийматга эга квартирани таклиф қилган, лекин Ч.Расулов бу таклифни рад этган.
Бугунги кунда, суд қарори туман МИБ томонидан ижро этилиши вв фуқаронинг мол-мулкини кўчириш, ҳамда эҳтиёт чораси сифатида ноқулай об-ҳаво шароитида буюмлар учун мўлжалланган сақлаш хонасига (контейнер) жойлаш назарда тутилган.
"Юқоридагилардан келиб чиқиб, ноқулай об-ҳаво шароитини ҳисобга олган ҳолда, тадбиркорга фуқаро кўчиб чиқиши учун маълум бир муддат беришни тавсия қиламиз. Шунингдек, тадбиркорлик субъекти ва фуқаролар имкон қадар муросага келишларини сўраб қоламиз", - дейилади туман ҳокимлиги хабарида.
