Хасталикка кўпинча кеч босқичда ташхис қўйилиши сабабли муолажалардан ҳамиша кутилган самара бўлмайди, дея хабар бермоқда ССВ Матбуот хизмати.
Бу дардга чалинган беморлар эркин ҳаракатланиш, мувозанатни сақлашга қийналади. Уларда мушаклар назорати босқичма-босқич заифлашиб боради. Ана шу симптомларни пасайтирувчи препаратлар таъсир кучи ва муддати эса чегараланган.
Исландия ва АҚШ олимлари мазкур муаммога самарали ечим топиш мақсадида Паркинсонни даволашнинг янги усули устида изланишлар олиб борди.
Тадқиқот давомида шу касалликдан азият чекувчи минглаб беморлар геномлари ўрганилиб, якунда бу патологиянинг ривожланиш хавфини оширувчи ITSN1 гени кашф қилинди.
Маълум бўлишича, ушбу геннинг мутацияга учраш эҳтимоли юқори. У асаб ҳужайралари фаолиятида муҳим роль ўйновчи протеин моддаларини ишлаб чиқариш учун жавобгар.
Олимлар хулосасига кўра, ITSN1 мутациялари нерв ҳужайраларининг нормал фаолияти бузилиши ва Паркинсон касаллиги ривожланишига олиб келиши мумкин.
Тадқиқотчилар ушбу янгилик келгусида хасталикни самарали даволаш усуллари ва таъсири юқори препаратлар ишлаб чиқишга хизмат қилишини ишонч билан таъкидламоқда.
