Олий Мажлис Қонунчилик палатасининг Саноат, қурилиш ва савдо масалалари қўмитаси аъзолари жамоат транспортида электрон тўлов ҳамда йўловчи ташишни брутто-шартнома асосида молиялаштириш тизимини жорий қилиш борасида олиб борилаётган ишлар ҳолатини Тошкент шаҳри мисолида назорат-таҳлил тартибида ўрганди.
Маълум бўлишича, 2020 йилда шаҳар жамоат транспортида автоматлаштирилган тўлов тизимидан 45244,4 минг йўловчи фойдаланган бўлса, 2023 йилда 78515,3 минг йўловчи фойдаланган. Тушум эса қарийб 3,5 баробарга ошиб, 28,4 млрд сўмдан 98,6 млрд сўмга етган.
Шунингдек, пойтахтимиздаги 11 та магистрал, 14 та ҳалқа, 99 та боғловчи ва 40 та етказиб берувчи жами 167 та йўналишдан иборат янги йўналишлар тармоғи асосида бир неча босқичда электрон тендер танловлари ўтказилган. Натижада 167 та йўналишнинг барчаси бўйича брутто-шартнома тизимида хизмат кўрсатиш учун шартномалар тузилган ва ушбу тизимга ўтказиш ишлари тўлиқ якунланган.
Ўрганишлар давомида депутатлар жамоат транспортида кўрсатилаётган хизматларнинг сифатини ошириш, жамоат транспортида тўловлар шаффофлигини таъминлаш, йўлкира ҳақини тўлашда электрон тўлов тизимларидан фойдаланишни рағбатлантириш ва автоматлаштирилган тўлов тизимини ривожлантириш мақсадида 2023 йил 1 ноябрдан Тошкент шаҳрида аҳоли учун қулай бўлган янги тарифлар жорий этилганига гувоҳ бўлишди.
Бундан ташқари, транспорт карталаридан фойдаланилган ҳолда бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тариф режалари тасдиқланган. Шунга кўра, бир соат ичида иккинчи автобусдан фойдаланиш 700 сўм, бир соат давомида учинчи ва тўртинчи автобусдан фойдаланиш эса мутлақо бепул этиб белгиланган.
Шу вақт давомида йўловчиларнинг метрополитенда иккинчи, учинчи ва тўртинчи маротаба ҳаракатланиши 1100 сўм этиб белгиланган. Энг асосийси, “Н – пенсионерлар ва ногиронлиги бўлган шахслар учун” қизил рангдаги транспорт картаси кўринишида, “Т – Талабалар учун” сариқ рангдаги транспорт картаси кўринишида, “Ў – ўқувчилар учун” яшил рангдаги транспорт картаси кўринишида 50 фоиз имтиёзли тарифлар жорий этилган.
Кунлик йўловчи оқими 1,7 бараварга кўпайиб, 1 миллионга етган. Электрон тўловларнинг умумий тушумдаги улуши эса 60 фоизни ташкил этмоқда.
Қўмита аъзоларининг ўрганишлари давомида ушбу соҳада бажарилган ишлар алоҳида эътироф этилиб, аниқланган айрим муаммо ва камчиликлар назоратга олинди.
