Бюджетнома маълумотларига кўра, соғлом турмуш тарзини тарғиб қилиш ва Жаҳон савдо ташкилоти талабларига мослашиш мақсадида ичимликлар бўйича актсиз солиғи ставкалари қайта кўриб чиқилади.
2026 йил 1 февралдан ароқ, коньяк ва бошқа алкоголь маҳсулотлари учун актсиз ставкаси маҳаллий маҳсулотларда 1 литр учун 48 минг сўм, импорт маҳсулотларда 60 минг сўм этиб белгиланади. 2026-йил 1 июлдан эса ушбу ставкалар 48 минг сўм миқдорида ягона тартибга ўтказилиши режалаштирилган.
Шунингдек, вино ва пиво учун ҳам янги ставкалар жорий этилиши таклиф қилинмоқда. 2026 йил 1 февралдан табиий винонинг 1 литри маҳаллий ишлаб чиқарувчилар учун 7 минг, импорт винолар учун 12 минг сўм қилиб белгиланиши кўзда тутилган.
Пиво бўйича эса маҳаллий маҳсулотлар учун 3 минг, импорт учун 5 минг сўм ставка белгиланиши режалаштирилган. 1 июлдан бошлаб эса вино ва пиво ставкалари тўлиқ тенглаштирилади.
2026 йил 1 январдан истеъмол ва техник этил спирти учун 1 литрига 15 минг сўм ставка сақлаб қолинади. Шу билан бирга, этил спиртининг бош фракцияси бўйича актсиз 15 минг сўмдан 5 минг сўмгача пасайтирилиши таклиф этилган.
Тамакига оид ўзгаришлар ҳам кутилмоқда: 2026 йил 1 февралдан айрим тамаки маҳсулотлари, июлдан эса фильтрли ва фильтрлисиз сигаретлар бўйича ставкалар 7 фоизга оширилади.
Бунда маҳаллий ва импорт маҳсулотлар учун ягона ставка жорий қилинади — масалан, 1 минг дона сигарет учун 365 минг сўм, 1 дона цигара учун 21,5 минг сўм миқдорида.
Мазкур ўзгаришлар президентнинг 2024 йил 3 июндаги фармонида белгиланган ЖСТ талаблари асосида актсиз солиғи сиёсатини босқичма-босқич уйғунлаштириш вазифаларига мувофиқ амалга оширилмоқда.
