Бош прокуратура ҳузуридаги Департамент қошидаги Алкоголь ва тамаки бозорини тартибга солиш инспекцияси томонидан лицензиялаш, акциз солиғи тўловини ўз вақтида амалга ошириш ҳамда сифатли алкоголь ва тамаки маҳсулотларини ишлаб чиқаришда тадбиркорлик субъектларига ҳуқуқий ёрдам кўрсатиш масалаларига алоҳида эътибор қаратилмоқда. Бу ҳақда инспекция матбуот хизмати хабар қилмоқда.
Маълумот ўрнида, Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунига асосан алкоголь ва тамаки маҳсулотларини ишлаб чиқариш ва муомалага киритишда лицензиясиз, рухсат этиш ҳусусиятига эга ҳужжатсиз ҳамда ваколатли органни хабардор этмасдан шуғулланганлик учун юридик шахсларга қуйидаги жарима турлари қўлланилади:
➖истеъмол ва техник этил спирти, алкоголь ва тамаки маҳсулотлари ишлаб чиқариш ҳамда улгуржи савдоси фаолиятини лицензиясиз амалга оширганлик учун БҲМнинг 300 баробари миқдорида;
➖алкоголь маҳсулотлари билан чакана савдо қилишни бошлаганлик ёки тугатганлик ҳақида ваколатли органни хабардор этмасдан амалга оширганлик учун БҲМнинг 75 баробари миқдорида;
➖пиво ва пиво ичимликлари ишлаб чиқариш ва улгуржи савдо қилиш фаолиятини бошлаганлик ёки тугатганлик ҳақида ваколатли органни хабардор этмасдан амалга оширганлик учун БҲМнинг 75 баробари миқдорида жарима.
Шунингдек, Жиноят кодексининг 186-1-моддасида этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш юзасидан жавобгарлик белгиланган.
Маълумот учун: этил спирти, алкоголь ва тамаки маҳсулотларини муомалага киритиш ёки ишлаб чиқаришда лицензиялаш, рухсат бериш ва хабардор қилиш тартиб-таомиллари тўғрисидаги қонунчиликни бузиш ҳолатларига дуч келган тақдирингизда Инспекциянинг +(71) 202 86 90 телефон рақамига мурожаат қилишингиз мумкин бўлади.
