Россияда Visa ва Mastercard карталарини босқичма-босқич муомаладан чиқариш режалаштирилмоқда. Бу ҳақда мамлакатдаги барча ички тўловларни қайта ишлайдиган Миллий тўлов карталари тизими маълум қилди.
Маълум қилинишича, ушбу мақсадда халқаро тўлов тизимлари карталари учун банклараро комиссия ставкалари босқичма-босқич пасайтирилади. Хусусан, 2027 йил бошидан комиссия миқдорини 1 фоизгача тушириш, 2028 йилдан эса уни тўлиқ бекор қилиш режалаштирилган.
Бу эса Россия банклари учун Visa ва Mastercard карталари билан ишлашни иқтисодий жиҳатдан манфаатсиз қилиб қўяди.
Эслатиб ўтамиз, Украинадаги уруш бошланганидан кейин Visa ва Mastercard Россия бозорини тарк этган, шундан сўнг мамлакат банклари мазкур карталарнинг амал қилиш муддатини узайтириш ёки уларни муддатсиз қилиш амалиётини жорий этганди.
