Қирғизистон Миллий хавфсизлик давлат қўмитаси қалбаки пулларни тайёрлаш ва сотиш билан шуғулланган трансмиллий гуруҳ фаолиятини фош этди. Бу ҳақда идора матбуот хизмати маълум қилди.
Маълумотларга кўра, жиноий гуруҳ бир нечта давлат ҳудудида фаолият юритиб, юқори сифатли қалбаки купюралар ишлаб чиқариш ҳамда уларни кенг тармоқ орқали сотишни йўлга қўйган.
Махсус операция давомида назорат остидаги харид пайтида Ўзбекистон ва Қирғизистон фуқаролари қўлга олинган. Улардан катта миқдорда қалбаки чет эл валютаси ва бошқа ашёвий далиллар мусодара қилинган.
Ҳолат юзасидан жиноят иши қўзғатилиб, гумонланувчилар тергов ҳибсхонасига жойлаштирилган. Айни пайтда жиноий схема иштирокчилари ва тарқатиш каналларини аниқлаш бўйича тергов ҳаракатлари давом эттирилмоқда.
