Бахтиёр Исломов Ўзбекистон Республикаси Олий суди раиси лавозимидан озод этилди. Бу ҳақда тегишли қарор қабул қилингани маълум бўлди.
Маълумот учун, Бахтиёр Исломов 2022 йил август ойида Олий Мажлис Сенатининг ўттизинчи ялпи мажлисида Олий суд раиси этиб сайланган эди.
У меҳнат фаолияти давомида Фарғона ва Тошкент вилоятларида судья сифатида ишлаган. Шунингдек, 2020 йил ноябрига қадар жиноят ишлари бўйича Тошкент шаҳар судига раислик қилган.
2020 йилда Президент Администрациясида фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчининг биринчи ўринбосари лавозимига тайинланган Исломов, кейинчалик Президентнинг ҳуқуқни муҳофаза қилувчи ва назорат органлари фаолиятини мувофиқлаштириш масалалари бўйича маслаҳатчиси сифатида ҳам фаолият юритган.
Эслатиб ўтамиз, ундан аввал Олий суд раиси лавозимида Козимжон Комилов ишлаб келган ва у саломатлиги билан боғлиқ сабабларга кўра ўз хоҳишига биноан лавозимидан озод этилган эди.
