ChatGPT ношири OpenAI миллардер Илон Маск қўлига ўтиши мумкин
Маск сунъий интеллект гиганти OpenAI’ни сотиб олишни режалаштирмоқда. Reuters ахборот агентлигининг хабар қилишича, Илон компанияни open source тамойилига ўтказиб, бутун инсониятга фойда келтирадиган нейротармоқлар яратишни ваъда қилмоқда.
Илон Маск бошчилигидаги инвесторлар гуруҳи OpenAI нинг назоратини қўлга киритиш мақсадида 97,4 миллиард долларлик таклиф билан чиқди. Бу ҳаракат Маск ва OpenAI бош директори Сэм Альтман ўртасидаги мавжуд зиддиятларни янада кучайтириши мумкин.
Маск OpenAI ни 2015 йилда Альтман билан биргаликда нодавлат нотижорат ташкилот сифатида асос солган, аммо компаниянинг ривожланишидан аввалроқ уни тарк этган эди. 2023 йилда у рақобатчи xAI сунъий интеллект стартапини ташкил қилди.
OpenAI ҳозирда нодавлат нотижорат ташкилотидан тижорат мақсадли компанияга айланишни режалаштирмоқда, бу эса сунъий интеллект моделларини ривожлантириш учун зарур капитални жалб қилишга қаратилган. Маск эса бу ўзгаришларга қарши чиқиб, OpenAI ни аввалги очиқ манбали ва хавфсизликка йўналтирилган ташкилот сифатида сақлаб қолишни истамоқда.
Сэм Альтман Маскнинг таклифига жавобан, "Йўқ, раҳмат, аммо агар хоҳласангиз, биз Twitter'ни 9,74 миллиард долларга сотиб оламиз", деб ёзди. Бу билан у Маскнинг 2022 йилда Twitter'ни сотиб олишини эсга олди.
Албатта бу ҳазил баёот, чунки якуний қарорни OpenAI директорлар кенгаши қабул қилади.
Шундай бўлсада, Маскнинг таклифи OpenAI нинг тижорат мақсадли компанияга айланиш жараёнини мураккаблаштириши мумкин. Айрим таҳлилчиларнинг фикрича, бу таклиф OpenAI нинг келажакдаги молиялаштириш жараёнларига таъсир қилиши мумкин.
Маск аввалроқ OpenAI ва Альтманга қарши судга мурожаат қилиб, уларни сунъий интеллектни ривожлантиришда жамоат манфаатларидан кўра фойдани устун қўйганликда айблаган эди. У OpenAI ни тижорат мақсадли компанияга айланишини тўхтатишни талаб қилган.
Бу воқеалар Маск ва Альтман ўртасидаги сунъий интеллект соҳасидаги рақобат ва қарама-қаршиликларни янада кучайтирмоқда.
Абдуллоҳ Саййид
