АҚШ Президенти Дональд Трамп Саудия Арабистони валиаҳд шаҳзодаси Муҳаммад бин Салмон билан учрашув чоғида мамлакат иқтисодиётига киритиладиган инвестициялар миқдорини 1,5 трлн долларгача ошириш таклифини илгари сурди. Трампга кўра, бу таклиф уларнинг биргаликдаги суратга тушиш жараёнида айтилган.
Давлат раҳбарининг айтишича, валиаҳд шаҳзода таклифни дарҳол тасдиқламаган, бироқ "ўйлаб кўриши керак бўлган жиҳатлар" борлигини билдирган. Шунга қарамай, Трамп АҚШ бу музокаралар натижасида "нимадир олиши"га умид қилаётганини таъкидлади.
Аввалроқ Трамп бин Салман АҚШга 600 млрд доллар инвестиция киритишга розилик билдиргани, бу миқдор 1 трлн долларгача етиши мумкинлигини айтганди.
Шунингдек, АҚШ Саудия Арабистонига янги авлод микручипларини етказиш бўйича рухсатнома устида ишлаётгани ҳам қайд этилди.
