Чехия шимоли-шарқида Крконоше тоғига ўрмонни кесиб ўтиш орқали бормоқчи бўлган туристлар тош девор орасидан чиқиб турган алюминий қутини топиб олди. CNN’нинг ёзишича, унинг ичидан 10 та тилла билагузук, 17 та портсигар, упадон, тароқ ва 598 та танга чиққан.
Туристлар топилмани Чехия Шарқий музейига топширган. Археологлар хазинани ўрганиб, у топилган ҳудудни тадқиқ этишга қарор қилган.
Олимлар ҳозирча ушбу буюмларни ким ва нима учун яширганини аниқлагани йўқ. Аммо таъкидланишича, хазинанинг ёши 100 дан ошмайди, чунки тангалардан бирига 1921 йил санаси туширилган.
Археологларнинг тахминича, тилла буюмлар Иккинчи жаҳон уруши бошланишидан олдин тоғли ҳудудда қолдириб кетилган бўлиши мумкин.
Топилган буюмлар қиймати ҳозирча номаълум. Қутидаги тангаларнинг оғирлигини ўзи 3,7 килограммни ташкил этади, уларнинг қиймати эса 360 минг долларга баҳоланмоқда. Шу билан бирга, улар орасида маҳаллий пуллар йўқ, ҳаммаси болқон ва французларники. Иккита портсигар қаттиқ ёпилган, шу боис унинг ичида яна нимадир бўлиши мумкинлиги айтилмоқда.
Музейдагилар ушбу хазина жуда ноодатий эканига эътибор қаратган. Олимлар барча металл буюмлар таркибини аниқлаши ва уларнинг қийматини баҳолаши учун қўшимча тадқиқотлар ўтказиши зарур.
