Ўзбекистонда уй-жойларнинг савдосини нақд пулда амалга ошириш чекланади. Бу ҳақда жорий йилнинг 26 июнь куни Олий Мажлис Сенатининг навбатдаги мажлисида Солиқ қўмитаси раисининг биринчи ўринбосари Мубин Мирзаев маълум қилди.
“Ҳали муаммолар кўп, буни кўриб турибмиз. Ҳанузгача хуфиёна иқтисодиётнинг улуши юқорилигача қолмоқда. Шунинг учун биз Молия вазирлиги, Марказий банк, Солиқ қўмитаси, Савдо-саноат палатаси ва тадбиркорлар билан биргаликда хуфиёна иқтисодиётга қарши курашиш бўйича Президент қарорини ишлаб чиқдик”, дейди у.
Мирзаевнинг билдиришича, бунда асосий эътибор нақдсиз ҳисоб-китоблар тизимларини рағбатлантиришга қаратилган. Барча вазирлик ҳамда идоралар билан келишилган ва администрацияга тақдим этилган.
“Жуда кўплаб давлатлар 2030 йилгача нақдсиз ҳисоб-китоблар тизимига ўтишни асосий мақсад қилиб қўйган. Шунинг учун, бу қарорда энг йирик ҳисоб-китобларни нақдсиз ҳисоб-китоблар тизими бўйича амалга ошириш ўз аксини топган. Буни кўчмас мулкдан бошлаяпмиз. Бугунги кунда уй сотиш ва сотиб олиш кўпинча нақд пулда амалга оширилади. Буларнинг ҳаммасини қонуний тартибда, банк айланмаси орқали амалга ошириш ва савдо қоидаларини бузмасдан тўғри ишлаш учун барча рағбатлантириш механизми ва худди шундай қонунни бузмасдан ишлаш тартиб, қонун-қоидаларини акс эттирдик. Ўйлайманки, шуни қабул қилиниши энг асосий дастак бўлади ва шу бўйича ишлаймиз”, дейди Мубин Мирзаев.
