Ўзбекистон миллий терма жамоаси бош мураббийи Фабио Каннаваро Жаҳон чемпионати гуруҳ босқичидаги сўнгги учрашувдан кейин ўтказилган матбуот анжуманида мағлубият сабаблари ҳақида фикр билдирди.
Унинг таъкидлашича, жамоа биринчи бўлимда яхши ўйин кўрсатган, аммо иккинчи таймдаги хатолар натижага салбий таъсир кўрсатган.
"Биринчи бўлимда жуда кўп энергия сарфладик. Шу кунгача жисмоний тайёргарлигимиз яхши даражада эди ва бугун ҳам шу жиҳатдан яхши ҳаракат қилдик. Рақибимиз ҳам жисмонан яхши тайёрланган жамоа эканини билардик. Учрашув олдидан тўпни назорат қилмасак, қийин бўлишини яхши тушунган эдик. Иккинчи бўлимда эса хатоларга йўл қўйдик ва шу сабабли голлар ўтказиб юбордик", — деди Каннаваро.
Италиялик мутахассиснинг сўзларига кўра, биринчи таймда Ўзбекистон терма жамоаси бир қатор хавфли вазиятлар яратган.
"Биринчи таймни жуда яхши бошладик, кўплаб имкониятларга эга бўлдик. Аммо иккинчи бўлимда хатолар қила бошладик ва бу бизга қимматга тушди", — деди бош мураббий.
Каннаваро ушбу мусобақа жамоа учун муҳим тажриба бўлганини ҳам қайд этди.
"Бу мусобақа мен учун ҳам, футболчилар учун ҳам катта тажриба бўлди. Ўйлайманки, бу келажакда бизга катта мотивация беради", — деди у.
Шунингдек, мураббий гуруҳ босқичида кучли рақибларга қарши майдонга тушишларини аввалдан билганини ва футболчиларнинг ҳаракатидан мамнун эканини таъкидлади.
"Албатта, футболчилар билан жуда кўп мулоқот қилдим. Гуруҳимизда кучли жамоаларга қарши ўйнашимизни билардик. Лекин ушбу натижадан афсусдамиз. Ҳа, биз хатолар қилдик. Бироқ мен футболчилардан умуман шикоят қилмоқчи эмасман. Улар қўлидан келган барча ишни қилди ва мен улардан фахрланаман", — деди Фабио Каннаваро.
