Президент Шавкат Мирзиёев 29 август куни Шаҳидлар хотираси хиёбонида бўлиб, қатағон қурбонларини ёдга олди.
Давлат раҳбари маросимда иштирок этиб, миллий озодлик, Ватан ва эътиқоди учун жонини фидо қилган юртдошлар хотирасини ҳурмат билан ёд этди.
Шундан сўнг, президент “Янги Ўзбекистон” боғидаги Мустақиллик монументи пойига гул қўйди.
Ушбу рамзий ҳаракат орқали мамлакат мустақиллигининг қадри ва унинг йўлида фидокорона хизмат қилган авлодлар хотираси яна бир бор эъзозланди.
Шу куни Шавкат Мирзиёев пойтахтда амалга оширилаётган бунёдкорлик ишлари билан ҳам танишиши режалаштирилган.
Жумладан, янги ижтимоий ва инфратузилма лойиҳаларининг бориши кўздан кечирилиши кутилмоқда.
Кечқурун эса давлат раҳбари Ўзбекистон Республикаси мустақиллигининг 34 йиллигига бағишланган байрам тадбирида иштирок этиб, халқимизга табрик сўзи билан мурожаат қилади.
Тадбир давомида мамлакат ривожланиши, келгуси режалар ва янгиланиш жараёнлари ҳақида сўз юритилиши кутилмоқда.
