АҚШ президенти Дональд Трамп мамлакат мустақиллигининг 250 йиллиги муносабати билан чиқариладиган янги паспорт дизайнини тақдим этди. Бу ҳақда CNN маълум қилди.
Маълум қилинишича, чекланган нусхада эсдалик сифатида чиқариладиган паспортда Трампнинг сурати жойлаштирилган.
"АҚШнинг янги паспорти. Унда: 'Хуш келибсиз, аммо одобли бўлинг!' деб ёзилган", — деб ёзди Трамп Truth Social ижтимоий тармоғидаги саҳифасида.
У эълон қилган намунавий паспорт саҳифасида Трампнинг Resolute иш столи ортидаги сурати, фонда эса АҚШ Мустақиллик декларациясининг асл матни ва пастки қисмида унинг имзоси акс этган. Қарама-қарши саҳифада эса рассом Жон Трамбуллнинг "Мустақиллик декларацияси" картинаси жойлаштирилган.
Оқ уй ҳам Х ижтимоий тармоғидаги расмий саҳифасида мазкур паспорт тасвирини эълон қилиб, уни "Американинг 250 йиллигига бағишланган янги АҚШ паспорти" деб таърифлади.
Шу билан бирга, Давлат департаменти ҳозирча ушбу тасвир эсдалик паспортининг якуний расмий дизайни эканига изоҳ бермаган.
Маълум қилинишича, паспорт илк бор апрель ойида АҚШ мустақиллигининг 250 йиллигини нишонлаш дастури доирасида тақдим этилган. Тайёр бўлгач, у Вашингтон паспорт агентлигида ҳужжатини шахсан янгилаётган фуқароларга стандарт паспорт сифатида берилади. Онлайн мурожаатлар ва бошқа ҳудудлардаги паспорт марказларида эса амалдаги дизайн сақланиб қолади.
