Кеча, 28 август куни Қамчиқ довонида одам ўлими билан боғлиқ иккита йўл-транспорт ҳодисаси юз берди. Бу ҳақида Наманган вилояти ИИБ ЙҲХБ хабар қилди.
Қайд этилишича, Водий-Тошкент йўналишида Lacetti автомашинасини бошқариб кетаётган ҳайдовчи ҳаракат хавфсизлигини таъминлай олмасдан ўзи билан бир йўналишда ҳаракатланиб келаётган юк машинасига урилиб, ЙТҲ содир этган.
Бунинг оқибатида Lacetti йўловчиси оғир тан жароҳати билан вафот этган. 2-йўловчи эса шифохонага ётқизилган.
Мазкур ҳудудда соат 08:39 ларда ҳам Cobalt бошқариб кетаётган ҳайдовчи ҳаракат хавфсизлигини таъминлай олмай, бошқарувни йўқотиб ўзи билан бир йўналишда йўлнинг ўнг томонида ҳаракатланиб кетаётган юк машинасининг орқа қисмига ва йўлнинг ўнг томонида ҳаракатланиб кетаётган яна бир юк машинасига бориб урилган.
Ҳодиса оқибатида Cобалтда бўлган икки йўловчи оғир тан жароҳатлари билан вафот этган.
Ҳар икки ҳолат юзасидан Поп туман ИИБ ТБ томонидан ЖКнинг 266-моддаси 2-қисми билан жиноят иши қўзғатилди.
