Ўзбекистонда ёрдамга муҳтож аҳолини ижтимоий ҳимоя қилишга катта миқдорда пул ажратилди. Бу ҳақда бугун, 29 август куни давлат раҳбари бошчилигида ўтказилаётган “Янги Ўзбекистон” боғида мамлакатимиз давлат мустақиллигининг 34 йиллигига бағишланган байрам тадбирида сўз борди.
Бу тизим хонадонларгача кириб боргани, эҳтиёжманд аҳоли билан индивидуал ишлаш йўлга қўйилгани, “Инсон” ижтимоий хизматлар марказлари ташкил этилгани барча учун тенг имконият яратилган инклюзив жамиятни шакллантиришга хизмат қилмоқда.
“мамлакатда бегона одам ҳам, бегона бола ҳам йўқ. Барчамиз ягона юрт фарзандларимиз, ягона Ватан равнақига хизмат қиламиз.
Шу маънода, битта бўлса ҳам қийин аҳволга тушиб қолган ҳамюртлар тақдири барчани бирдек ташвишга солиши керак. Чунки халқнинг энг катта қудрати – меҳр-оқибат, саховат ва бирдамликдадир”,
– деди Президент.
Умуман, бу йилнинг ўзида ёрдамга муҳтож аҳолини ижтимоий ҳимоя қилишга 19 триллион сўм маблағ йўналтирилмоқда.
Буларнинг барчаси ўз самарасини бериб, мамлакатда камбағаллик даражасини 6,8 фоизга туширишга эришилди. Халқаро ташкилотлар беш-олти йил олдин ушбу рақамни 35 фоиз атрофида баҳолаганини ҳисобга олсак, қисқа даврда бу борада қандай катта йўлни босиб ўтганимиз яққол аён бўлади.
“Биз тадбиркорликни ривожлантириш, кексалар, хотин-қизлар, ёшлар, ижтимоий ёрдамга муҳтож инсонларни қўллаб-қувватлаш, камбағалликни қисқартириш бўйича ишларимизга янги шиддат берамиз. Халқ учун муносиб шароитлар яратиш борасидаги ислоҳотлар бир дақиқа ҳам тўхтамайди”,
– дейди давлат раҳбари.
