Англияда 16 ёшга тўлмаганларга дўконлар, ресторанлар, кафелар, савдо автоматлари ва интернет орқали Red Bull, Monster ва Prime каби энергетик ичимликларни сотиш тақиқланади. Бу ҳақда BBC хабар берди.
Билдирилишича, Буюк Британия болаларининг учдан бири ҳар ҳафта энергетик ичимлик истеъмол қилади. Аксарият супермаркетлар аллақачон ихтиёрий тақиқни жорий этган. Баъзи ичимликлар икки стакан қаҳвадан ҳам кўпроқ кофеинга эга. Ортиқча истеъмол бош оғриғи, уйқусизлик, тез юрак уриши ва юрак ритми бузилишига сабаб бўлиши мумкин.
Камдан-кам ҳолларда ортиқча кофеин ўлимга ҳам сабаб бўлган. Шакарли турлари эса тишларга зарар етказиб, семиришга ҳам олиб келади.
“Бу ичимликларнинг соғлиққа, диққатни жамлашга ва ўқишга таъсирини кўришингиз мумкин, шунинг учун биз чоралар кўрмоқдамиз”, деган Соғлиқни сақлаш ва ижтимоий таъминот вазири Уэс Стритинг.
Қонун лойиҳасини муҳокама қилиш учун 12 ҳафта давомида соғлиқ ва таълим мутахассислари, жамоатчилик, чакана сотувчилар ва ишлаб чиқарувчилар фикри йиғилади. Тақиқ амалдаги парламент муддати тугашидан анча олдин кучга кириши кутилмоқда. Bite Back номли ёшлар фаоллари гуруҳидан 18 ёшли Каррера ишлаб чиқарувчилар болаларни жалб қилиш учун блогерлар билан ишлашини айтди. Striting эса бунга жавобан ҳукумат “замонга мослашиши” ва ижтимоий тармоқлардаги рекламаларга қарши ҳам чоралар кўриши лозимлигини таъкидлади.
