Тошкент вилоятининг Чирчиқ шаҳрида Бўзсув каналига тушиб кетган аёл қутқарувчилар томонидан қутқариб қолинди. Бу ҳақда Фавқулодда вазиятлар вазирлиги маълум қилди.
Маълум қилинишича, бугун, 26 июнь куни соат 09:50 атрофида Чирчиқ шаҳрининг «Дўстлик» маҳалласи ҳудудидан оқиб ўтувчи Бўзсув канали соҳилида Камолот ГЭС ходимлари сув оқимида оқиб кетаётган фуқарони пайқаган. Улар зудлик билан тегишли тезкор хизматларга хабар берган.
Ҳодиса жойига етиб келган қутқарувчилар сувга шўнғиб, аёлни соҳилга олиб чиққан. Жабрланувчига воқеа жойида биринчи тиббий ёрдам кўрсатилган ва шифокорлар ихтиёрига топширилган. Ҳозирда унинг аҳволи яхши экани билдирилмоқда.
Дастлабки маълумотларга кўра, аёл эҳтиётсизлик оқибатида каналга тушиб кетган. Сузишни билмагани сабабли у кучли сув оқимида оқиб кетган.
Эслатиб ўтамиз, жорий йилнинг 9 июнь куни Тошкент шаҳрининг Сергели туманида каналда оқиб кетаётган ўсмир қизни темирйўл ходими қутқариб қолган эди. Кейинчалик у жасорати учун ташаккурнома, эсдалик совғаси ҳамда пул мукофоти билан тақдирланган.
