Ҳиндистонда чақалоқ қорнидан икки ҳомила топилди. Бу ҳақда “Тhe Times of India” нашри ёзмоқда.
Гургаон шаҳридаги шифохонада амалга оширилган жарроҳлик жараёнида 15 нафар шифокор қатнашган. Мутахассисларнинг айтишича, “ҳомила ичида ҳомила” деб аталувчи бу ҳолат 500 мингта туғилишдан фақат бирида учрайди.
Онанинг ҳомиладорлиги уч эгизак билан бошланган бўлса-да, улардан бири қолганларини ўзига сингдириб юборган. Туғилган қизалоқ 20 кунлигида қорин шишиши ва овқат емай қўйиши сабаб шифохонага ётқизилган. Текширув натижасида ошқозонини сиқиб турган ўсма аслида нотўғри шаклланган эмбрионлар экани аниқланган.
Икки соатлик мураккаб операциядан кейин чақалоқ соғлом ҳолда жавоб берилган. Шифокорларнинг маълум қилишича, у ҳозир ўзини яхши ҳис қилмоқда.
