Франция Президенти оиласи АҚШ судида бринчи хоним Брижит Макроннинг аёл эканини исботловчи “фото ва илмий далиллар” тақдим этади. Бу ҳақда Макронларнинг адвокати Том Клерга таяниб, ББC хабар берди.
Маълум бўлишича, далиллар Макронлар томонидан Брижит Макрон эркак бўлиб туғилганини даъво қилган америкалик инфлюенсер Кендис Оуенсга қарши очилган туҳмат бўйича суд жараёнида тақдим этилади.
“Илмий характерга эга эксперт гувоҳлиги бўлади”, — дейди Том Клер.
Ҳуқуқшуноснинг сўзларига кўра, унинг мижозлари Оуенснинг айбловлари ёлғон эканини “умумий ва аниқ маънода” исботлаш ниятида.
“Франциянинг биринчи хоними ва унинг турмуш ўртоғи айбловлар ва уларнинг шахсий ҳаётига тажовуз қилишдан қаттиқ таъсирланган. Шунга қарамай, (Брижит Макрон) вазиятга узил-кесил ойдинлик киритишга 100 фоиз тайёр”, дейди Клер.
Адвокат, шунингдек, Брижит Макрон ҳомиладорлик ва эмизиш пайтида олинган фотосуратларни тақдим этишга тайёрми, деган саволга ижобий жавоб берган.
Брижит Макроннинг ўғил бўлиб туғилгани ҳақидаги иддаолар бир неча йиллардан бери тарқалиб келмоқда. 2021 йилда бундай гаплар француз блогерлари Амандин Рой и Наташа Рей томонидан фаол равишда тарқатилди. Макронлар уларга қарши туҳмат бўйича ишда ғалаба қозонди.
Бироқ ўтган йили қарор блоггерларнинг даъволари тўғри экани сабабли эмас, балки сўз эркинлиги ҳуқуқи туфайли бекор қилинди. Ушбу даъволарни такрорлаган Оуенсга қарши АҚШда даъво жорий йил июль ойида қўзғатилган.
