Кеча, 29-октабр куни Ўзбекистоннинг Биринчи хоними Зироат Мирзиёева ва Сербия Республикасининг Биринчи хоними Тамара Вучич ўртасида Тошкент шаҳрида самимий учрашув бўлиб ўтди.
Учрашув давомида икки давлат халқлари ўртасидаги дўстона алоқаларни янада ривожлантириш, шунингдек, гуманитар ва маданий ҳамкорликни кенгайтириш масалалари муҳокама қилинди.
Ўзбекистон Президенти Шавкат Мирзиёев ва Сербия Президенти Александр Вучич ўртасидаги юқори даражадаги музокаралар натижалари икки мамлакат ўртасидаги муносабатларни янги босқичга олиб чиқиши, халқлар ўртасидаги ўзаро тушуниш ва дўстликни мустаҳкамлашига ишонч билдирилди.
Суҳбатдан сўнг, Ўзбекистон Биринчи хоними меҳмонга Ўзбекистон халқ амалий санъати ва анъаналарини акс эттирувчи махсус маданий дастур тақдим этилди.
Учрашув дўстона ва ишончли муҳитда ўтиб, икки томонлама ҳамкорликни чуқурлаштиришга бўлган қатъий ирода яна бир бор тасдиқланди.
