Женевадаги музокаралардан кейин АҚШнинг Россия–Украина можаросини тугатишга қаратилган тинчлик режаси сезиларли даражада қайта ишланди — 28 банддан 19 тасигина қолди. Қисқартириш Киев ва ЕИ эътирозларидан кейин амалга оширилди.
“Financial Times”нинг ёзишича, Украина ва Европа Иттифоқи вакиллари ҳужжатдаги айрим талабларни қабул қилиб бўлмаслигини айтганидан сўнг тинчлик режаси жиддий қайта кўриб чиқилди. Украина Президент девони маслаҳатчиси Александр Бевзнинг айтишича, дастлабки 28 бандлик пакет энди мавжуд эмас — бир қисми чиқарилган, яна бир қисми тубдан ўзгартирилган. У Киевнинг барча таклиф ва эътирозлари инобатга олинганини таъкидлаган.
“The Washington Post” маълумотларига кўра, янгиланган лойиҳадан АҚШ ва Россия ўртасидаги, Украина можаросига тўғридан-тўғри дахли бўлмаган муносабатларга оид бандлар чиқариб ташланган.
Киев НАТОга аъзолик масаласини альянснинг ички қоидалари асосида — барча давлатлар консенсуси билан ҳал қилишни талаб қилган. Бу ўзгариш дастлабки лойиҳадаги “НАТО кенгайишига вето ҳуқуқи бериш” таклифини амалда бекор қилади.
“Politico”нинг хабар қилишича, Владимир Зеленский энг нозик ҳудудий масалаларни Дональд Трамп билан тўғридан-тўғри муҳокама қилишни режалаштирмоқда. Бу учрашув шакли очиқ — шахсан ёки телефон орқали бўлиши мумкин.
“Bloomberg” маълумотига кўра, янгиланган режадан яна бир муҳим банд — Россиянинг музлатилган активларидан тахминан 100 млрд долларни АҚШ назоратидаги Украина тикланиш фондига йўналтириш ҳақидаги таклиф ҳам чиқарилди. Европа амалдорлари буни ижобий баҳолаган, чунки олдинги вариантда фойданинг 50 фоизи АҚШга берилиши кўзда тутилганди.
