Инсон аъзолари савдосида гумон қилинаётган Украина фуқароси Полша ҳудудидан Қозоғистонга экстрадиция қилинди. Бу ҳақда Zamon.uz нашри хабар берди.
Маълумотларга кўра, ушбу аёл 2017–2018 йилларда инсон аъзоларининг ноқонуний олди-сотдиси билан шуғулланган халқаро уюшган жиноий гуруҳ таркибида фаолият олиб борган. Тергов материалларида қайд этилишича, жиноий гуруҳ тирик инсонларнинг тана аъзолари савдоси бўйича жами 56 та ноқонуний битимни амалга оширган.
Мазкур битимлар доирасида трансплантация амалиётлари Қозоғистоннинг соғлиқни сақлаш муассасаларида ўтказилгани аниқланган. Гумонланувчи жорий йил март ойида Полшада қўлга олинган.
Полша ҳуқуқ-тартибот органлари тақдим этган маълумотларга кўра, жиноий гуруҳ фаолияти оқибатида Қозоғистон, Арманистон, Озарбайжон, Украина, Қирғизистон, Тожикистон, Ўзбекистон ҳамда Таиланднинг жами 56 нафар фуқароси жабрланган ва улардан буйраклар ноқонуний равишда олиб қўйилган.
Ҳозирда мазкур ҳолат юзасидан тергов ҳаракатлари давом эттирилмоқда.
