АҚШ президенти Дональд Трамп 7 январь куни Колумбия президенти Густаво Петро билан телефон орқали суҳбатлашгани ва уни Оқ уйга таклиф қилганини маълум қилди. Бу ҳақда у Truth Social ижтимоий тармоғида ёзди.
Маълум қилинишича, суҳбат чоғида икки давлат ўртасидаги муносабатлар, гиёҳванд моддалар муаммоси ҳамда мавжуд келишмовчиликлар муҳокама қилинган. Бу мулоқот Трампнинг Колумбияга нисбатан ҳарбий чоралар кўриш мумкинлиги ҳақидаги баёнотидан кейин бўлиб ўтган илк алоқа ҳисобланади.
Трампнинг билдиришича, Вашингтонда учрашувни ташкил этиш ишлари бошланган, бироқ аниқ сана ҳозирча очиқланмаган. “Reuters”га кўра, Густаво Петро ҳам қўнғироқни “самимий ва ҳурматга асосланган” дея баҳолаб, икки давлат муносабатларини тиклаш муҳимлигини таъкидлаган.
Қайд этиш жоиз, Трампнинг Оқ уйга қайтишидан кейин АҚШ ва Колумбия етакчилари ўртасидаги муносабатлар совуқлашган эди.
