Маҳаллий соғлиқни сақлаш идоралари маълумотига кўра, Ал-Кассам масжиди яқинида содир бўлган ҳаво ҳужуми натижасида беш нафар фаластинлик, шу жумладан уч бола вафот этган. Уларнинг жасадлари Ғазо шаҳридаги Ал-Шифо шифохонасига олиб келингани айтилмоқда. Болаларнинг аниқ ёши ҳозирча маълум қилинмаган.
Шифохона вакиллари жасадлар қабул қилинганини тасдиқлаган.
Ғазо ҳукуматига қарашли ОАВ идораси билдиришича, октябр ойида ҲАМАС билан эълон қилинган ўт очишни тўхтатиш келишуви Исроил томонидан 2400 марта бузилгани айтилмоқда. Булар қаторида мақсадли зарбалар, ҳибсга олиш ҳолатлари, блокадалар ва аҳолига нисбатан чекловлар қайд этилган.
“Save the Children” ташкилоти сентябр ойидаги ҳисоботида Ғазодаги низо давомида 20 мингдан ортиқ бола ҳалок бўлганини маълум қилган. Ташкилот маълумотларига кўра, ҳар соатда ўртача камида бир бола ҳаётдан кўз юммоқда.
БМТ Бош котиби Антониу Гутерриш 2023 йил ноябрида Ғазодаги вазиятни “болалар қабристони” деб таърифлаган.
Шу билан бирга, турли томонлар Ғазога гуманитар ёрдам, жумладан озиқ-овқат, дори-дармон ва бошқа зарур маҳсулотлар кириши чекланаётгани ҳақида ҳам баёнотлар бермоқда. Бу ҳудудда тахминан 2,4 миллион аҳоли, жумладан кўчирилган минглаб инсонлар оғир шароитда яшамоқда.
