Хитой расмийлари мамлакат компанияларига АҚШ ва Исроилда ишлаб чиқарилган айрим киберхавфсизлик дастурларидан фойдаланишни тўхтатиш бўйича кўрсатма берди. Бу ҳақда масаладан хабардор манбаларга таяниб Reuters агентлиги хабар қилди.
Маълум қилинишича, қарор миллий хавфсизликка доир хавотирлар сабаб қабул қилинган. Пекин Ғарб разведка идоралари ушбу дастурлар орқали махфий маълумотларни қўлга киритиши мумкинлигидан хавотир билдирган.
Тақиқланган дастурлар орасида АҚШнинг VMware, Palo Alto Networks, Fortinet ҳамда Исроилнинг Check Point Software компанияси маҳсулотлари бор. Умуман олганда, рўйхатга АҚШ ва Исроилнинг ўнлаб технологик компаниялари киритилган.
Reuters’нинг қайд этишича, Хитой ҳукумати бу кўрсатмани айнан нечта компанияга юборгани ҳозирча маълум эмас. Интернет назорати идоралари ва саноат вазирлиги ушбу масала юзасидан изоҳ беришдан бош тортган.
Агентликка кўра, Пекин Ғарб технологияларини босқичма-босқич маҳаллий ишланмалар билан алмаштиришга интилмоқда. Бу қарорга АҚШ билан кучайиб бораётган савдо ва технологик рақобат ҳам таъсир кўрсатгани айтилмоқда.
