Forbes ва Visual Capitalist тақдим этган инфографикага асосан, 2026 йилда дунёдаги энг бой инсон Илон Маск бўлди. Унинг бойлиги 714,2 миллиард долларни ташкил этиб, Маск тарихда 700 миллиард доллар чегарасидан ўтган биринчи инсон сифатида қайд этилди.
Маълум қилинишича, 2020 йилдан бери Маскнинг капитали қарийб 30 баробарга ошган. Унинг бойлигининг асосий қисми SpaceX компаниясидаги улушига тўғри келади. Айни пайтда 800 миллиард долларга баҳоланаётган компаниядаги Маск улуши 366 миллиард долларга тенг. 2026 йилда SpaceX IPO‘си амалга оширилса, компания қиймати 1,5 триллион долларгача етиши мумкин.
Рейтингда иккинчи ўринни Google ҳамтаъсисчиси Ларри Пейж эгаллади. Унинг бойлиги 257,7 миллиард долларга етган бўлиб, бу Alphabet акцияларининг 2025 йилда 63 фоизга қимматлашгани билан боғлиқ.
Nvidia бош директори Женсен Хуанг 162,5 миллиард доллар бойлик билан саккизинчи ўриндан жой олган. Nvidia акцияларининг сўнгги етти йилда 4200 фоиздан ортиқ ўсиши уни энг тез бойлик орттираётган миллиардерлардан бирига айлантирган.
Шу билан бирга, Билл Гейтснинг бойлиги 2020 йилдан бери деярли ўзгармаган. Ўша пайтда дунёда иккинчи ўринда турган миллиардер 2026 йилга келиб 18-ўринга тушиб кетган. Бунинг асосий сабаби унинг катта миқдордаги маблағларни хайрия ишларига, жумладан, Билл ва Мелинда Гейтс жамғармасига йўналтиргани билан изоҳланади.
