Бугун, 4 июнь куни Ўзбекистон Республикаси Президенти Шавкат Мирзиёев Хитой Халқ Республикасининг Сянган (Гонконг) махсус маъмурий ҳудуди Администрацияси раҳбари Ли Цзячао бошчилигидаги делегацияни қабул қилди. Бу ҳақда давлат раҳбарининг матбуот хизмати маълум қилди.
Билдирилишича, учрашув аввалида Ли Цзячао давлат раҳбарига Хитой Раиси Си Цзиньпиннинг самимий саломи ва эзгу тилакларини етказди.
Музокаралар чоғида Ўзбекистон ва Хитой ўртасидаги ҳар томонлама стратегик шериклик муносабатларини янада ривожлантириш, шунингдек, Гонконг билан ҳудудлараро алмашинувлар ва амалий ҳамкорликни кенгайтириш масалалари муҳокама қилинди.
Томонлар кейинги йилларда Ўзбекистон – Хитой муносабатлари мисли кўрилмаган даражада мустаҳкамланганини қайд этди. Шунингдек, олий даражада эришилган келишувлар изчил амалга оширилаётгани таъкидланди.
Хусусан, май ойида Пекин шаҳрида Ҳукуматлараро комиссия йиғилиши, Сиань шаҳрида учинчи Ҳудудлараро форум бўлиб ўтгани, Гонконгда иқтисодий форум ва саноат кўргазмаси ташкил этилгани ҳамда Ўзбекистон Савдо уйи очилгани қайд этилди.
Учрашувда Ўзбекистон ҳудудлари билан Гонконг ўртасидаги иқтисодий ҳамкорлик салоҳиятидан самарали фойдаланиш масаласига алоҳида эътибор қаратилди. Тошкент шаҳрига Гонконг ишбилармон доиралари вакилларидан иборат йирик делегация ташриф буюргани мазкур йўналишдаги ҳамкорликни янги босқичга олиб чиқиши мумкинлиги таъкидланди.
Шунингдек, савдо-иқтисодий ва молиявий алоқаларни кенгайтириш, саноат кооперациясини ривожлантириш, таълим ва туризм соҳаларидаги ҳамкорликни мустаҳкамлаш, тўғридан-тўғри авиақатновларни йўлга қўйиш ҳамда консуллик хизматларини кенгайтиришни назарда тутувчи комплекс ҳамкорлик дастурини қабул қилиш муҳимлиги қайд этилди.
Томонлар “яшил” энергетика, қишлоқ хўжалиги, биотехнологиялар, рақамли иқтисодиёт, финтех, инновацион стартаплар ва сунъий интеллект соҳаларини ҳамкорликнинг устувор йўналишлари сифатида белгилади.
Музокаралар якунида устувор лойиҳаларни амалга ошириш бўйича қўшма “йўл харитаси”ни қабул қилиш, Ишбилармонлар кенгашини ташкил этиш ҳамда яқин вақт ичида Ўзбекистон ва Гонконг ўртасида икки томонлама визасиз тартибни жорий этиш юзасидан келишувга эришилди.
