Табиий газдан ноқонуний фойдаланиш ҳолатларини аниқлаш ва уларни олдини олишга қаратилган назорат тадбирларидан бири “Ҳудудгаз Қашқадарё” газ таъминоти филиали, шаҳар газ таъминоти бўлими ходимлари, “Ўзенергоинспекция” ва ҳуқуқ-тартибот органлари ҳамкорлигида Қашқадарё вилоятининг Қарши шаҳрида ўтказилди, дея хабар бермоқда Энергетика вазирлиги.
Хабарда келтирилишича, шаҳарда жойлашган “М. Ш. Қ. С.” МЧЖга қарашли кўп қаватли турар-жой биноси хатловдан ўтказилганда, таъминот корхонаси билан шартнома тузмасдан ва лойиҳа ҳужжатлари расмийлаштирмасдан тармоққа тўғридан тўғри уланган ҳолда табиий газдан ноқонуний фойдаланиб келинаётгани аниқланган.
Ҳолат юзасидан далолатнома тузилиб, дастлабки ҳисоб-китобларга кўра 4 миллиард 90 миллион 141 минг сўм зарар аниқланди. Барча материаллар ҳуқуқ-тартибот органларига юборилди, дейилади хабарда.
