АҚШ Президенти Дональд Трамп мамлакатда бензин нархини зудлик билан пасайтиришни талаб қилди. Унинг айтишича, ёнилғи сотувчилари нархларни сунъий равишда юқори ушлаб турган бўлса, уларни “катта муаммолар” кутиши мумкин.
Трамп бу ҳақда бугун, 30 июнь куни ўзининг Truth Social ижтимоий тармоғидаги саҳифасида маълум қилди.
“Бензин сотувчилари нархларни ЗУДЛИК БИЛАН тушириши шарт”, деб ёзди у.
Президентнинг таъкидлашича, нархларни асоссиз равишда оширишга йўл қўйилмайди ва бу қонунга зид ҳисобланади. Шунингдек, у бензиннинг бир галлони (тахминан 3,78 литр) нархини 2,50 доллар атрофига туширишни бошлаш кераклигини билдирган.
Аввалроқ Трамп АҚШ Адлия вазирлигига нефть компаниялари фаолиятини текшириш бўйича топшириқ берган эди. Унинг фикрича, жаҳон бозорида хом нефть арзонлашаётганига қарамай, айрим компаниялар ёнилғи қуйиш шохобчаларида бензин нархини туширмаяпти ва истеъмолчиларни асоссиз равишда ортиқча тўлов қилишга мажбур этмоқда.
Эслатиб ўтамиз, жорий йил бошида АҚШ ва Исроилнинг Эронга қарши ҳарбий ҳаракатлари ортидан Яқин Шарқдаги кескинлик кучайиб, жаҳон бозорида нефть нархи сезиларли даражада ошган эди. Кейинчалик дипломатик музокаралар фаоллашиши ортидан нефть ва ёнилғи нархларида маълум даражада пасайиш кузатилди.
Айни пайтда АҚШда ноябрь ойида бўлиб ўтадиган Конгрессга оралиқ сайловлар арафасида ёнилғи нархининг юқори бўлиши ҳокимият учун сиёсий жиҳатдан муҳим масалалардан бирига айланган. Шу боис Трамп маъмурияти бензин нархини пасайтириш орқали сайловчилар норозилигини юмшатишга интилмоқда.
