“Ахборотлаштириш тўғрисида”ги Қонунга киритилган қўшимча ва ўзгартиришларга кўра, сунъий интеллект технологияларидан фойдаланишнинг умумий асослари ҳамда ушбу соҳада ваколатли давлат органининг ваколатлари аниқ белгилаб берилди.
Қонунда таърифланишича, сунъий интеллект — инсоннинг билим ва кўникмаларига тақлид қилиш, мустақил ўрганиш, ечимларни излаш ҳамда аниқ вазифаларни бажариш орқали инсон ақлий фаолияти натижаларига таққосланадиган хулосаларни олиш имконини берувчи технологик ечимлар мажмуасидир. Шу билан бирга, инсоннинг ҳуқуқ ва эркинликларига дахлдор бўлган юридик аҳамиятга эга қарорларни қабул қилишда фақат сунъий интеллект асосида ишлайдиган ахборот тизимлари хулосаларига таяниш мумкин эмаслиги белгиланди.
Шунингдек, сунъий интеллект технологияларидан фойдаланган ҳолда шахсга доир маълумотларга қонунга хилоф равишда ишлов бериш, уларни оммавий ахборот воситалари, телекоммуникация тармоқлари ёки Интернет жаҳон ахборот тармоғида тарқатиш маъмурий ҳуқуқбузарлик ҳисобланади.
Бундай ҳолатда ҳуқуқбузарликни содир этишда фойдаланилган қурол мусодара қилиниб, базавий ҳисоблаш миқдорининг 50 бараваридан 100 бараваригача, яъни 41 миллион 200 минг сўмгача жарима солиниши назарда тутилган. Қонун расмий эълон қилинган кундан эътиборан кучга кирди.
