АҚШ воситачилигида Россия ва Украина делегациялари ўртасидаги навбатдаги музокаралар 1 февраль куни Абу-Дабида бўлиб ўтади. Бу ҳақда АҚШнинг исми ошкор этилмаган расмийси ОАВ билан телефон брифингида маълум қилди.
У Абу-Дабида бўлиб ўтган дастлабки тўғридан-тўғри музокараларни “катта қадам” деб атаб, томонлар ўртасида ўзаро ҳурмат сезилганини таъкидлади. АҚШ Президентининг махсус вакили Стив Уиткофф ҳам музокаралар конструктив руҳда ўтганини билдириб, келаси ҳафта учрашув давом эттирилишини тасдиқлади.
Маълум қилинишича, 22 январь куни Москвада Стив Уиткофф, Жаред Кушнер ва Оқ уй маслаҳатчиси Жош Грюенбаум Россия Президенти Владимир Путин билан тўрт соатлик учрашув ўтказган. Унда ҳал этилмай қолган масалалар, жумладан ҳудудий муаммолар муҳокама қилинган.
23–24 январь кунлари Абу-Дабида ёпиқ эшиклар ортида ўтган музокараларда Украина делегациясига Рустам Умаров, Россия томонига эса Игор Костюков раҳбарлик қилган. Владимир Зеленский муҳокамаларни ижобий баҳолаган бўлса-да, Москва Донбассдан Украина қўшинларини олиб чиқиш талабини яна такрорлади. Киев бу талабни рад этмоқда.
Шунингдек, музокараларнинг биринчи кунидан сўнг Россия Украинага навбатдаги ракета ва дрон ҳужумларини амалга оширди. Киев расмийлари бу зарбаларни тинчлик жараёнига қарши қаратилган дея баҳолади.
