Сурхондарё вилоятида Йўл ҳаракати патруль инспекторига 10 миллион сўм миқдорида пора таклиф қилган Ҳиндистон фуқароси ушланди. Бу ҳақда Ички ишлар вазирлиги Жамоат хавфсизлиги департаменти маълум қилди.
Қайд этилишича, ЙПХ ходими техник носозлиги мавжуд автомобилни бошқариб кетаётган чет эллик фуқарони тўхтатиб, ҳужжатларни текширмоқчи бўлган. Шунда фуқаро маъмурий жавобгарликдан қутулиш мақсадида инспекторга 10 млн сўм пора таклиф қилган.
Тезкор тадбир давомида у пулни беришга уринган вақтида ушланган. Ҳолат юзасидан Жиноят кодексининг 211-моддаси 1-қисми (пора бериш) билан жиноят иши қўзғатилди. Автомобиль жарима майдончасига жойлаштирилган.
Аввалроқ вилоятда Экология, атроф-муҳитни муҳофаза қилиш ва иқлим ўзгариши бошқармасининг туман бўлими раҳбари ҳам пора билан қўлга тушгани ҳақида хабар берган эдик.
