2026 йилги футбол бўйича Жаҳон чемпионатининг очилиш учрашуви мундиаллар тарихидаги ноёб статистик натижа билан ёдда қолди. Мексика ва Жанубий Африка терма жамоалари ўртасидаги баҳсда ҳакамлар уч нафар футболчини майдондан четлатди.
Кеча, 11 июнь куни Мехико шаҳридаги “Астека” стадионида бўлиб ўтган баҳсда мезбонлар Жанубий Африка терма жамоасини 2:0 ҳисобида мағлуб этди.
Учрашувнинг 49-дақиқасида бразилиялик ҳакам Уилтон Сампайо Жанубий Африка ярим ҳимоячиси Сфивело Ситолени тўғридан тўғри қизил карточка билан майдондан четлатди. Кейинчалик унинг жамоадоши Темба Зване ҳам қизил карточка олди.
Баҳснинг 90+2-дақиқасида эса Мексика терма жамоаси сардори Сесар Монтес ҳам майдонни муддатидан олдин тарк этишга мажбур бўлди.
Шу тариқа Жаҳон чемпионатлари тарихида очилиш учрашувида илк бор бир ўйиннинг ўзида учта қизил карточка қайд этилди.
Бундан аввалги рекорд 1990 йил Италия мезбонлик қилган мундиалда ўрнатилган эди. Аргентина ва Камерун терма жамоалари ўртасидаги очилиш баҳсида икки нафар футболчи майдондан четлатилган. Ўшанда камерунлик Андре Кана-Бийик қизил карточка олган бўлса, Бенжамин Массинг иккинчи сариқ карточкадан кейин ўйинни тарк этган.
Қизил карточкалар сони бўйича Жаҳон чемпионатлари рекорди эса 2006 йилги мундиалга тегишли. Германияда ўтган мусобақанинг Португалия ва Нидерландия ўртасидаги 1/8 финал баҳсида россиялик ҳакам Валентин Иванов тўрт нафар футболчини майдондан четлатган.
