Маълум бўлишича, Наманган вилояти Қурилиш ва уй-жой коммунал хўжалиги бош бошқармасининг икки нафар бош мутахассиси ўзаро тил бириктириб, маҳаллий тадбиркорга тегишли бўлган Янги Наманган туманида жойлашган 2 қаватли нотурар бино учун қурилиш рухсатномаси, архитектура-режалаштириш топшириғи ва лойиҳа ҳужжатларини ижобий ҳал қилиб бериш эвазига 22 минг АҚШ доллари талаб қилган.
Улар жорий йил март ойида 7 минг АҚШ долларини олган. Давлат хавфсизлик хизмати ходимлари томонидан Бош прокуратура ҳузуридаги Департамент билан ҳамкорликда ўтказилган тезкор тадбирда мансабдорлардан бири қолган 15 минг АҚШ долларини олган вақтида ашёвий далиллар билан ушланди. Иккинчи бош мутахассис ҳам процессуал тартибда қўлга олинди.
Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.
Фуқаролардан шу каби қонунбузилиш ҳолатларига дуч келганда ДХХнинг 1520 қисқа рақамига мурожаат қилиш сўралади. Шахснинг сир сақланиши кафолатланади.
