Ҳудудгаз Қорақалпоғистон маълум қилишича, Қорақалпоғистонда ҳаво ҳароратининг кескин пасайиши сабаб магистраль газ тармоқларида босим тушиб кетган. Шу муносабат билан автомобилларга газ тўлдириш компрессор шохобчалари фаолиятига вақтинча чекловлар жорий этилди.
Маълум қилинишича, газ таъминоти биринчи навбатда аҳоли хонадонлари ва ижтимоий соҳа объектларига йўналтирилган. Расмийларга кўра, вазият 3–4 кун ичида барқарорлашиши ва газ босими тикланиши билан шохобчалар фаолияти босқичма-босқич қайта йўлга қўйилиши кутилмоқда.
Шунингдек, “Ўзгидромет” прогнозига кўра, яқин кунларда ҳудудда ҳаво ҳарорати кечалари -7 даражагача совиши мумкин.
