Эронлик хонанда Парасту Аҳмадий ва унинг жамоасидаги саккиз нафар аъзо “беҳаё ва ахлоқсиз контент” яратиш ҳамда тарқатишда айбдор деб топилиб, 74 дарра қамчилаш жазосига ҳукм қилинди. Бу ҳақда The Guardian нашри хабар берди.
Маълум қилинишича, Қум провинцияси жиноят ишлари бўйича суди уларга нисбатан қамчилаш жазосидан ташқари, икки йил муддатга мамлакатдан чиқишни тақиқлаш ва бир йил давомида ижодий фаолият билан шуғулланмаслик чорасини ҳам қўллаган.
Ҳукмга хонанданинг 2024 йил декабрь ойида жонли эфирда ҳижобсиз ҳолда “Аз Хуне Ҷавононе Ватан” (“Ватан ёшлари қонидан”) номли қўшиқни ижро этгани сабаб бўлган. Ушбу видео ижтимоий тармоқларда кенг тарқалиб, YouTube платформасида қарийб уч миллион марта томоша қилинган.
Мазкур эфирдан сўнг Парасту Аҳмадий ва бир неча мусиқачи қисқа муддатга ҳибсга олинган, кейинчалик озод қилинган эди. Шундан сўнг Эрон расмийлари видеонинг тарқатилиши юзасидан жиноий иш қўзғатган.
АҚШда жойлашган Эрондаги Инсон ҳуқуқлари маркази вакили Баҳор Ғандиҳарий ушбу қарор мамлакатда инсон ҳуқуқлари билан боғлиқ вазият ўзгармаганининг яна бир исботи эканини таъкидлаган.
Эронлик ҳуқуқшунос Муин Хазаэлий эса мамлакат қонунчилигида аёлларнинг қўшиқ куйлаши, мусиқа ижро этиши ёки мусиқий асарлар яратиши жиноят сифатида белгиланмаганини қайд этган.
Маълумот учун, 2025 йилда ҳам Эронда яна бир хонанда аёллар кийинишига оид чекловларни танқид қилган қўшиғи сабаб 74 дарра қамчилаш жазосига ҳукм қилинган эди.
