Жорий йилнинг 25 февраль куни 10-синф ўқувчиси BMWʼда уриб кетган Йўл-патруль хизмати ходими кеча, 27 февраль куни вафот этганди. Ушбу ходимнинг оила аъзолари давлат муҳофазасига олинади. Бу ҳақда Ички ишлар вазирлиги матбуот котиби Шоҳрух Ғиёсов хабар берди.
Унга кўра, Ички ишлар органларида 2022 йил иш бошлаган Хосилбек 2024 йилдан фаолиятини патруль пост хизматида давом эттирган.
Хизмат давомида қоидабузарликларни олдини олишда жонбозлик кўрсатиб, юзлаб йирик халқаро ва оммавий тадбирларда жамоа тартибини сақлашда қатнашган. 2014 йилда турли ҳуқуқбузарликларни аниқлашда тўрт нафар қидирувдаги шахсларни қўлга олишда фаол иштирок этган.
12 нафар наркожиноятчиларнинг фаолиятига чек қўйган. Раҳбарият томонидан унинг ишчанлиги ва бурчига садоқати, муҳими фуқаролар билан муомаласи инобатга олиниб, 2025 йилдан Тошкент шаҳар Ички ишлар бош бошқармаси йўл хизмати инспектори сифатида хизматга сафарбар этилган.
Хосилбек навбатдаги фаолияти давомида 1392 та, шундан 324 та қўпол қоидабузарликларни аниқлаган.
14 та маст ҳайдовчини ҳаракатига чек қўйган. Ундан ташқари қарама-қарши ҳаракатланиш, ҳужжатсиз транспорт воситасини бошқариш ва қизил чироққа бўйсунмаслик каби 52 та қоидабузарликларни аниқлаб, ҳуқуқбузарларга қонуний чора кўрган.
У жорий йилнинг 25 февраль куни пойтахтнинг Миробод тумани Нукус кўчасида бегона транспорт воситасини олиб қочиб, юқори тезликда ҳаракатланаётган воияга етмаган қонунбузарни йўлини тўсиб, ўз жонини аямаган ҳолда юзага келиши мумкин бўлган оғир оқибатни олдини олган.
Қаҳрамонларча ҳаракат қилган ходим оғир тан жароҳатлар олган. Кўрсатилган тиббий ёрдам ва мутахассисларнинг ҳаракатларига қарамасдан, Хосилбек шифохонада вафот этган.
“Оиланинг кенжа фарзанди, ота-онасининг суянган тоғи, икки қиз ва бир ўғилнинг ишонган қалқони, рафиқасининг севимли турмуш ўртоғи эндигина 33 баҳорни қарши олаётганди”, дейди Ғиёсов.
Содир бўлган ҳолат юзасидан Жиноят кодексининг 267-моддаси (транспорт воситасини олиб қочиш) 1-қисми ва 104-моддаси (қасддан баданга оғир шикаст етказиш) 3-қисми “д” банди билан жиноят иши қўзғатилиб, гумонланувчи қўлга олинган.
“Қаҳрамон ходим, хизматдошлари ҳамда Ички ишлар вазирлиги раҳбарияти томонидан сўнгги манзилга кузатилиб, оиласи давлат муҳофазасига олинади. Хосилбекнинг кўрсатган жасорати эса Ички ишлар вазирлиги шахсий таркиби, сафдошлари ҳамда у хизмат қилган халқ қалбида мангу яшайди. Она-юрт ўз қаҳрамон фарзандини ҳеч қачон унутмайди”, дейди Ғиёсов.
