28 февраль куни Эронга қарши АҚШ ва Исроил томонидан амалга оширилган қўшма ҳарбий операция бир неча ой давом этиши мумкин. Бу ҳақда Исроил хавфсизлик манбаси 12-каналга маълум қилган.
Манбага кўра, операция икки давлат ўртасида яқин ҳамкорликда ишлаб чиқилган бўлиб, барча босқичлар олдиндан мувофиқлаштирилган.
Дастлабки босқич тўрт кунга мўлжалланган. Илк зарбалар эрталабки вақтда амалга оширилгани, бу эса Эрон томонини кутилмаган вазиятга солиш мақсадида танланган стратегик қадам экани таъкидланмоқда.
Айни пайтда, АҚШ президенти Дональд Трумп Эрон билан музокаралардан норози эканини билдириб, Теҳроннинг ядровий қуролга эга бўлишига қатъиян қарши эканини яна бир бор таъкидлади.
Унинг сўзларига кўра, Эрон уранни бойитиш имкониятига ҳам эга бўлмаслиги керак.
